Oʻzbekiston Respublikasi Qurolli Kuchlari va huquqni muhofaza qiluvchi organlari oʻrtasida ot sportining polo turi boʻyicha "Milliy gvardiya kubogi" musobaqasi boʻlib oʻtdi. (https://telegra.ph/Oʻzbekiston-Respublikasi-Qurolli-Kuchlari-va-huquqni-muhofaza-qiluvchi-organlari
Oʻzbekiston Respublikasi Qurolli Kuchlari tashkil etilganligining 33 yilligi hamda 14-yanvar – Vatan himoyachilari kuniga bagʻishlangan musobaqaning rasmiy qurʼa tashlash marosimidan soʻng, jamoalar qizgʻin va shiddatli bahslarda bellashish uchun katta maydonga tushishdi. Musobaqa davomida harbiy chavandozlar oʻzlarining epchilligi, tezkorligi va mohirona otda harakatlanishini namoyon etishdi.
Bahslar musobaqa qoidalariga muvofiq olib borilib, har bir oʻyin 7 daqiqadan iborat boʻldi va 3 boʻlimni tashkil etdi.
Musobaqaga yanada koʻtarinki kayfiyat ulashish maqsadida Milliy gvardiya Kavaleriya eskadroni chavandozlari ot sportining tentpegging va ot ustida jigitovka elementlarini, Jamoat xavfsizligi universiteti kursantlari esa qoʻl jangi boʻyicha koʻrgazmali chiqishlar qilishdi.
Yakuniy natijalarga koʻra, birinchi oʻrinni Milliy gvardiya terma jamoasi qoʻlga kiritib, musobaqaning mutlaq gʻolibiga aylandi. Ikkinchi oʻrinni esa Davlat xavfsizlik xizmati Chegara qoʻshinlari jamoasi egallagan boʻlsa, uchinchi oʻrin Mudofaa vazirligi jamoasiga nasib etdi.
Gʻolib jamoalar tashkilotchilar tomonidan kubok, medal, diplom va esdalik sovgʻalari bilan munosib taqdirlandilar.
