Milliy gvardiya Toshkent shahar qoʻriqlash boshqarmasi anjumanlar zalida Milliy gvardiya boʻlinmalarida shartnoma asosida xizmat qilayotgan harbiy xizmatchi va xodimlar ishtirokida hududlar bilan on-layn konferens aloqa tarzida “Serjantlar forumi” oʻtkazildi.
Shuni alohida taʼkidlashimiz kerakki, bugungi serjantlar askarlarning ustozi, ofitserlarning eng yaqin yordamchisi sanaladi. Milliy gvardiya tizimida ham serjantlar tarkibini tayyorgarligiga alohida eʼtibor qaratilib, har qanday murakkab vaziyatlarda jismoniy va ruhiy sinovlarga bardosh bera oladigan, nostandart holatlarda mustaqil qaror qabul qilib, yuklatilgan vazifalarni aʼlo darajada bajarishga qodir boʻlgan kichik komandirlarni shakllantirish uchun barcha sharoitlar yaratilmoqda. Boʻlib oʻtgan forumda ham serjantlar ijtimoiy-huquqiy himoya, ustoz-shogird, odob-ahloq, jangovar xizmat va qoʻriqlash faoliyatida serjant hamda safdorlarning tutgan oʻrni, serjantlar kengashi faoliyati samaradorligi mavzularida koʻrgazmali vositalar yordamida maʼruzalar qilishdi va oʻz takliflarini bildirishdi.
Oʻzbekiston Respublikasi Prezidenti, Qurolli Kuchlar Oliy Bosh Qoʻmondoni taʼkidlaganidek “Jangovar harakatlar dinamikasi oshib borayotgan va yangi usullar paydo boʻlayotgan hozirgi sharoitda muvaffaqiyat, koʻp jihatdan, komandir-serjant boshqaradigan kichik boʻlinmalar harakatiga bogʻliq”. Shunday ekan serjantlardan bu borada katta masʼuliyat mustahkam iroda, yuqori malaka, intellektual jihatdan yetuklik talab qilinadi. Forumda ham aynan shu jihatlarga alohida urgʻu qaratildi.
Shuningdek, Milliy gvardiya tizimida Ixtisoslashtirilgan oʻquv markazi va uning negizida Qoraqalpogʻiston Respublikasi, Fargʻona, Jizzax va Toshkent mintaqaviy oʻquv markazlari faoliyati yoʻlga qoʻyilib, bunda Qurolli Kuchlar va huquqni muhofaza qilish organlari uchun professional serjantlar, oddiy askar va safdorlar tayyorlash, qayta tayyorlash, malakasini oshirish ishlari yoʻlga qoʻyildi.
Milliy gvardiya tizimida oliy maʼlumotli hamda professional tayyorgarlikka ega, murakkab vaziyatlarda mustaqil qaror qabul qila oladigan, komandirlik qobiliyatiga ega boʻlgan serjant va oddiy askarlar birlamchi ofitserlik lavozimlariga tayinlanib, boshlangʻich “leytenant” unvoni berilayotgani, davlatimizning yuqori mukofotlari bilan taqdirlanayotgani ham olib borilayotgan islohotlarning samarasi hisoblanadi. Albatta boʻlib oʻtgan ushbu forum serjantlarning bilim va koʻnikmalarini yanada oshirishga xizmat qilganligi bilan ahamiyatli boʻldi.