Mehribonlik uylaridagi bolalarni oilaga yaqin muhitda tarbiyalash, bilim va maʼnaviyatli vatanparvar insonlar etib voyaga yetkazishga alohida eʼtibor qaratilmoqda. Bu borada yangi tizim joriy qilinishi va bunga Milliy gvardiya masʼul etib belgilanishida juda katta maqsad bor. Ushbu vazifani amalga oshirish borasida "Oilaviy bolalar uyi" tashkil etish istagida bo‘lgan fuqarolar qabul qilinib, ularga qisqa muddatlarda barcha zarur shart-sharoitlar yaratib berilmoqda. Sirdaryo viloyati Guliston shahrida ham ilk marotaba ana shunday mehrli qalblar uyi tashkil etildi. Guliston shahar, Bahor MFYda istiqomat qiluvchi Boltayevlar oilasi Guliston shahridagi "Bolalar shaharchasi"ga tegishli tartibda, 5 tagacha bola olishga sharoiti borligini bildirdi. Sirdaryo viloyati bo‘yicha Milliy gvardiya boshqarmasi xodimlari bu mavzuni ochiq qo‘ymasdan oilaning sharoitini borib o‘rgandi. Shart-sharoitlari bilan tanishish davomida oila barcha talablarga javob berishi aniqlangach hokimlik qarori asosida Boltayevlar oilasiga bir nafar qiz hamda to‘rt nafar o‘g‘il biriktirildi. Eslatish joizki, qonunchilikka ko‘ra “Oilaviy bolalar uyi“ga berilgan bolalarni yashash davrida, voyaga yetgunga qadar asrab olgan ota-onalarga davlat tomonidan muntazam yordamlar ko‘rsatiladi. Mazkur "Oilaviy bolalar uyi"ni ochilishida Milliy gvardiya qo‘mondoni o‘rinbosari polkovnik Mamayusupov Sarvar Dehqonovich ham ishtirok etib mavjud shart-sharoitlarni ko‘zdan kechirdi. Chindan ham, bola oila muhitida erkin o‘sib, ota- ona mehri va tarbiyasini ko‘rib ulg‘ayishi nechog‘lik katta ahamiyatga egaligi bilan bir qatorda ularni tarbiyalash ulkan masʼuliyat talab etishi hech kimga sir emas. Boltayevlar xonadoni esa bugunda 5 nafar chin yetim bolani asrab olib insonparvarlikning yuksak namunasini ko‘rsatdi.