Меҳрибонлик уйларидаги болаларни оилага яқин муҳитда тарбиялаш, билим ва маънавиятли ватанпарвар инсонлар этиб вояга етказишга алоҳида эътибор қаратилмоқда. Бу борада янги тизим жорий қилиниши ва бунга Миллий гвардия масъул этиб белгиланишида жуда катта мақсад бор. Ушбу вазифани амалга ошириш борасида "Оилавий болалар уйи" ташкил этиш истагида бўлган фуқаролар қабул қилиниб, уларга қисқа муддатларда барча зарур шарт-шароитлар яратиб берилмоқда. Сирдарё вилояти Гулистон шаҳрида ҳам илк маротаба ана шундай меҳрли қалблар уйи ташкил этилди. Гулистон шаҳар, Баҳор МФЙда истиқомат қилувчи Болтаевлар оиласи Гулистон шаҳридаги "Болалар шаҳарчаси"га тегишли тартибда, 5 тагача бола олишга шароити борлигини билдирди. Сирдарё вилояти бўйича Миллий гвардия бошқармаси ходимлари бу мавзуни очиқ қўймасдан оиланинг шароитини бориб ўрганди. Шарт-шароитлари билан танишиш давомида оила барча талабларга жавоб бериши аниқлангач ҳокимлик қарори асосида Болтаевлар оиласига бир нафар қиз ҳамда тўрт нафар ўғил бириктирилди. Эслатиш жоизки, қонунчиликка кўра “Оилавий болалар уйи“га берилган болаларни яшаш даврида, вояга етгунга қадар асраб олган ота-оналарга давлат томонидан мунтазам ёрдамлар кўрсатилади. Мазкур "Оилавий болалар уйи"ни очилишида Миллий гвардия қўмондони ўринбосари полковник Мамаюсупов Сарвар Деҳқонович ҳам иштирок этиб мавжуд шарт-шароитларни кўздан кечирди. Чиндан ҳам, бола оила муҳитида эркин ўсиб, ота- она меҳри ва тарбиясини кўриб улғайиши нечоғлик катта аҳамиятга эгалиги билан бир қаторда уларни тарбиялаш улкан масъулият талаб этиши ҳеч кимга сир эмас. Болтаевлар хонадони эса бугунда 5 нафар чин етим болани асраб олиб инсонпарварликнинг юксак намунасини кўрсатди.