Aziz va moʻtabar ustozlarimizni qancha ulug‘lasak ham kam.  Yurtboshimiz taʼbiri bilan aytganda, “Taraqqiyotning tamal toshi ham, mamlakatni qudratli, millatni buyuk qiladigan kuch ham ilm-fan, taʼlim va tarbiyadir”.

Milliy gvardiya ixtisoslashtirilgan o‘quv markazida bo‘lib o‘tgan tantanali marosim ham, 1 oktyabr – O‘qituvchi va murabbiylar kuniga bag‘ishlandi va unda Milliy gvardiya qo‘mondonligi tomonidan bir guruh o‘qituvchi va murabbiylar munosib taqdirlandi.

Mazkur tadbirda Xalq taʼlimi, Sog‘liqni saqlash vazirliklari va hamkor tashkilotlar mutasaddi rahbarlari hamda tizimga qarashli taʼlim muassasalarining ustoz va murabbiylari ishtirok etdi.

Tadbir avvalida so‘z olgan Milliy gvardiya qo‘mondoni o‘rinbosari, polkovnik S.Mamayusupov yosh avlodga taʼlim-tarbiya berish yo‘lida ustozlarning zahmatli mehnatini alohida eʼtirof etdi, shuningdek, so‘nggi yillarda mamlakatimizda ilm-fan va taʼlim-tarbiya davlat siyosatining ustuvor yo‘nalishiga aylanganligi, bu yo‘nalishdagi islohotlarning amalga oshirilishida ustoz-murabbiylarning o‘rni juda muhim ahamiyat kasb etishini taʼkidladi.

Shu bilan bir qatorda, bayram tadbirida so‘zga chiqqan mutasaddilar ham fidoyi ustozlar hamda taʼlim-tarbiya sohasining barcha jonkuyar xodimlarini O‘qituvchi va murabbiylar kuni bayrami bilan chin qalbdan tabrikladi.

Shundan so‘ng, Milliy gvardiya qo‘mondoni buyrug‘i o‘qib eshittirilib, taʼlim muassasalarining o‘quvchi, tinglovchi va kursantlariga zamonaviy taʼlim-tarbiya berib, ularning qalbiga mardlik va jasurlik, vatanparvarlik va olijanoblik, o‘z xalqi va yurtiga sadoqat hissini joylashda fidokorona xizmat qilib kelayotgan bir qator o‘qituvchi va murabbiylar turli darajadagi “Namunali xizmatlari uchun” hamda “Maʼnaviyat aʼlochisi” ko‘krak nishonlari, faxriy yorliq, qimmatbaho sovg‘alar bilan taqdirlandi.

Shuningdek, Qo‘l jangi va Ot sporti sirlarini yoshlarga mohirona o‘rgatib kelayotgan bir guruh murabbiylar ham mukofotlandi. Tantanali marosimning badiiy qismida el suygan sanʼatkorlarimiz tomonidan tayyorlangan konsert dasturi barchaga bayram shukuhini ulashdi.