ТАЪЛИМ-ТАРБИЯ СОҲАСИНИНГ ЖОНКУЯР ХОДИМЛАРИ УМУМХАЛҚ БАЙРАМИ-ЎҚИТУВЧИ ВА МУРАББИЙЛАР КУНИ БИЛАН МУНОСИБ ТАҚДИРЛАНДИЛАР
Азиз ва мўътабар устозларимизни қанча улуғласак ҳам кам. Юртбошимиз таъбири билан айтганда, “Тараққиётнинг тамал тоши ҳам, мамлакатни қудратли, миллатни буюк қиладиган куч ҳам илм-фан, таълим ва тарбиядир”.
Миллий гвардия ихтисослаштирилган ўқув марказида бўлиб ўтган тантанали маросим ҳам, 1 октябрь – Ўқитувчи ва мураббийлар кунига бағишланди ва унда Миллий гвардия қўмондонлиги томонидан бир гуруҳ ўқитувчи ва мураббийлар муносиб тақдирланди.
Мазкур тадбирда Халқ таълими, Соғлиқни сақлаш вазирликлари ва ҳамкор ташкилотлар мутасадди раҳбарлари ҳамда тизимга қарашли таълим муассасаларининг устоз ва мураббийлари иштирок этди.
Тадбир аввалида сўз олган Миллий гвардия қўмондони ўринбосари, полковник С.Мамаюсупов ёш авлодга таълим-тарбия бериш йўлида устозларнинг заҳматли меҳнатини алоҳида эътироф этди, шунингдек, сўнгги йилларда мамлакатимизда илм-фан ва таълим-тарбия давлат сиёсатининг устувор йўналишига айланганлиги, бу йўналишдаги ислоҳотларнинг амалга оширилишида устоз-мураббийларнинг ўрни жуда муҳим аҳамият касб этишини таъкидлади.
Шу билан бир қаторда, байрам тадбирида сўзга чиққан мутасаддилар ҳам фидойи устозлар ҳамда таълим-тарбия соҳасининг барча жонкуяр ходимларини Ўқитувчи ва мураббийлар куни байрами билан чин қалбдан табриклади.
Шундан сўнг, Миллий гвардия қўмондони буйруғи ўқиб эшиттирилиб, таълим муассасаларининг ўқувчи, тингловчи ва курсантларига замонавий таълим-тарбия бериб, уларнинг қалбига мардлик ва жасурлик, ватанпарварлик ва олижаноблик, ўз халқи ва юртига садоқат ҳиссини жойлашда фидокорона хизмат қилиб келаётган бир қатор ўқитувчи ва мураббийлар турли даражадаги “Намунали хизматлари учун” ҳамда “Маънавият аълочиси” кўкрак нишонлари, фахрий ёрлиқ, қимматбаҳо совғалар билан тақдирланди.
Шунингдек, Қўл жанги ва От спорти сирларини ёшларга моҳирона ўргатиб келаётган бир гуруҳ мураббийлар ҳам мукофотланди. Тантанали маросимнинг бадиий қисмида эл суйган санъаткорларимиз томонидан тайёрланган концерт дастури барчага байрам шукуҳини улашди.
