O‘zbekiston Respublikasi Milliy Gvardiyasi hamda Maktabgacha va maktab taʼlimi vazirligi hamkorligida Respublikamiz viloyatlarida Milliy gvardiyaga biriktirilgan 56 ta maktabning harbiy-vatanparvarlik sinflarining chaqiruvga qadar boshlang‘ich tayyorgarlik fani o‘qituvchilari uchun o‘quv yig‘iniga start berildi.
“Temurbeklar maktabida" bo‘lib o‘tayotgan tadbirning ochilish marosimida O‘zbekiston Respublikasi Milliy gvardiyasi qo‘mondoni o‘rinbosari polkovnik S.Mamayusupov va Maktabgacha va maktab taʼlimi vaziri o‘rinbosari Dilshod Kenjayev ishtirok etishib, mazkur o‘quv yig‘inining o‘quvchilarni vatanparvarlik yo‘nalishida tarbiyalashda juda muhim o‘rin tutishiga alohida to‘xtalib o‘tdi.
Ushbu tadbirdan ko‘zlangan maqsad chaqiruvga qadar boshlang‘ich tayyorgarlik fani o‘qituvchilarini bilim va malakasini oshirish, jangovar shayligini sinovdan o‘tkazish va vatan taqdiriga daxldorlik hisini kuchaytirishdan iborat.
Mazkur tadbir davomida mashg‘ulotlar 5 kun davomida bo‘lib o‘tadi. O‘qituvchilar uchun bir qator poytaxtimizdagi diqqatga sazovor maskanlarga sayohatlar rejalashtirilgan. Jumladan, “G‘alaba bog‘i” yodgorlik majmuasi, “O‘zbekiston Respublikasi Qurolli Kuchlar tarixi Davlat muzeyi” va “Qatag‘on qurbonlari xotirasi davlat muzeyiga” ekskursiyalar ham tashkil etish rejalashtirilgan.
Shuningdek, ular Milliy gvardiya tizimidagi taʼlim muassasalari va bo‘linmalari faoliyati bilan ham tanishishadi.
O‘quv yig‘inidan ko‘zlangan yana bir maqsad kelgusida ular o‘z hududlaridagi ustozlar uchun o‘quv-yig‘inlarini tashkil etishlari ko‘zda tutilgan.
Maʼlumot uchun: mazkur o‘quv yig‘ini 9 yanvarga qadar davom etadi
