“Krossfit” sport turi bo‘yicha Milliy gvardiya Buxoro viloyati Qo‘riqlash boshqarmasi boshlig‘i birinchiligi kubogi tashkil etildi

Milliy gvardiya Buxoro viloyati Qo‘riqlash boshqarmasi tashabbusi bilan tizimda xizmat olib borayotgan xodimlarni “Krossfit” sport turiga qiziqtirish, ushbu sport turini xodimlar orasida ommalashtirish maqsadida ilk bor Qo‘riqlash boshqarmasi boshlig‘i birinchiligi kubogi tashkil etildi.

Buxoro sport majmuasida o‘tkazilgan mazkur musobaqa xodimlarda katta qiziqish uyg‘otib, murosasiz bahslar asosida g‘oliblar aniqlandi. Ishtirokchilar vaqtni to‘xtatmagan holda amalga oshirilgan beshta sport turi bo‘yicha musobaqa, 2 km masofaga 12 kg og‘irlikdagi himoya nimchasini kiygan holda yugurish, 70 kg og‘irlikdagi yuk avto ulovining shinalarini 20 metr masofaga uloqtirib borish, 40 kg og‘irlikdagi toshni 20 marotaba ko‘tarib, shundan so‘ng ushbu toshni ko‘targan holda 20 metr masofaga maxsus mashqlar bajarib borish, ushbu mashqlar so‘ngida esa yerga tayangan xolda qo‘llarni bir daqiqa vaqt davomida to‘xtovsiz bukib yozish shartlarini o‘z ichiga oldi.

Shuni alohida taʼkidlash joizki, krossfit sport turi bo‘yicha musobaqalarning Milliy gvardiya tizimida yo‘lga qo‘yilishi xodimlarning jismoniy tayyorgarligini oshirish, sog‘lomlashtirish hamda xizmatdan tashqari bo‘sh vaqtlarini to‘g‘ri va mazmunli tashkil etish maqsadida o‘tkazilmoqda.

Murosasiz kechgan bahslar natijasiga ko‘ra, shaxsiy g‘oliblikda birinchi o‘rin safdor Azam G‘afforov, ikkinchi o‘rin safdor Fattoyev Abdufattoh, uchinchi o‘rin safdor Ortiqov Jahongirlarga nasib etgan bo‘lsa, umumjamoa hisobida birinchi o‘rinni Qorako‘l tuman qo‘riqlash bo‘limi, ikkinchi o‘rinni Vobkent tuman qo‘riqlash bo‘limi, uchinchi o‘rinni esa G‘ijduvon tuman qo‘riqlash bo‘limi jamoalari egallashdi.