Qoraqalpog‘iston Respublikasiga xizmat safari chog‘ida tarbiyaviy va mafkuraviy ishlar boshqarmasi hamda shaxsiy xavfsizlik boshqarmasi vakillari Milliy gvardiya Qoraqalpog‘iston Respublikasi bo‘yicha boshqarmasining shaxsiy tarkibi va uning joylardagi bo‘linmalari ishtirokida bir qator tadbirlar o‘tkazdi.

Xususan, harbiy xizmatchilar va ularning oila aʼzolari, shuningdek, ayol harbiy xizmatchilar, xodimalar va ishchi xizmatchilar, uylanmagan bo‘ydoq harbiy xizmatchilar bilan uchrashuvlarda qonun va intizomga rioya qilish, Milliy gvardiya qo‘mondonining buyruqlari va boshqa normativ hujjatlar mavzusida suhbatlar o‘tkazildi. Shuningdek, oilalardagi munosabatlar, uydagi muhit, uning xodimlar psixologik holatiga, keyinchalik ularning xizmat vazifalarini bajarishiga taʼsiri masalalari ko‘tarildi. Suhbatlar ochiq muloqot ko‘rinishida o‘tkazildi. Ishtirokchilar Milliy gvardiya Markaziy apparati vakillariga o‘zlarini qiziqtirgan savollarini berishdi. Uchrashuvlar yakunida habiy xizmatchilar va ularning oila aʼzolari uchun sayyor qabullar tashkil etildi. Har bir murojaat tinglandi, ularning bir qatori bo‘yicha mutasaddilarga topshiriqlar berilib, ayrimlari joyida hal qilindi.

Bundan tashqari, Nukus shahridagi 8-oilaviy poliklinika negizida harbiy xizmatchilarning oila aʼzolari uchun chuqurlashtirilgan tibbiy ko‘rik tashkil etildi. Tibbiy ko‘rik vaqtida shifokorlar har bir oila bilan kasalliklarning oldini olish, jismoniy faoliyatning ahamiyati va tanani chiniqtirish mavzusida suhbatlar o‘tkazishdi. Shifokorlar tomonidan bolalarga alohida eʼtibor qaratilib, ularga sportning foydalari va o‘sib borayotgan organizm uchun zararli odatlarning oqibatlari bo‘yicha tushuntirishlar berildi.

Shuningdek, Markaziy apparat vakillari inspektor-psixologlar bilan mashg‘ulotlarda va xodimlar va ularning oila aʼzolari bilan tashkil etilgan sport tadbirlarida ishtirok etishdi.