Қорақалпоғистон Республикасига хизмат сафари чоғида тарбиявий ва мафкуравий ишлар бошқармаси ҳамда шахсий хавфсизлик бошқармаси вакиллари Миллий гвардия Қорақалпоғистон Республикаси бўйича бошқармасининг шахсий таркиби ва унинг жойлардаги бўлинмалари иштирокида бир қатор тадбирлар ўтказди.

Хусусан, ҳарбий хизматчилар ва уларнинг оила аъзолари, шунингдек, аёл ҳарбий хизматчилар, ходималар ва ишчи хизматчилар, уйланмаган бўйдоқ ҳарбий хизматчилар билан учрашувларда қонун ва интизомга риоя қилиш, Миллий гвардия қўмондонининг буйруқлари ва бошқа норматив ҳужжатлар мавзусида суҳбатлар ўтказилди. Шунингдек, оилалардаги муносабатлар, уйдаги муҳит, унинг ходимлар психологик ҳолатига, кейинчалик уларнинг хизмат вазифаларини бажаришига таъсири масалалари кўтарилди. Суҳбатлар очиқ мулоқот кўринишида ўтказилди. Иштирокчилар Миллий гвардия Марказий аппарати вакилларига ўзларини қизиқтирган саволларини беришди. Учрашувлар якунида ҳабий хизматчилар ва уларнинг оила аъзолари учун сайёр қабуллар ташкил этилди. Ҳар бир мурожаат тингланди, уларнинг бир қатори бўйича мутасаддиларга топшириқлар берилиб, айримлари жойида ҳал қилинди.

Бундан ташқари, Нукус шаҳридаги 8-оилавий поликлиника негизида ҳарбий хизматчиларнинг оила аъзолари учун чуқурлаштирилган тиббий кўрик ташкил этилди. Тиббий кўрик вақтида шифокорлар ҳар бир оила билан касалликларнинг олдини олиш, жисмоний фаолиятнинг аҳамияти ва танани чиниқтириш мавзусида суҳбатлар ўтказишди. Шифокорлар томонидан болаларга алоҳида эътибор қаратилиб, уларга спортнинг фойдалари ва ўсиб бораётган организм учун зарарли одатларнинг оқибатлари бўйича тушунтиришлар берилди.

Шунингдек, Марказий аппарат вакиллари инспектор-психологлар билан машғулотларда ва ходимлар ва уларнинг оила аъзолари билан ташкил этилган спорт тадбирларида иштирок этишди.