SPORT YОSHLARNI BIRLASHTIRADI
Inson hayotida sport nafaqat jismoniy tayyorgarlik va chiniqish, balki jamoalar va ularning a'zolari orasida o‘zaro jipslik va birdamlikni, ahillikni ta'minlovchi, ishtirokchilarga ma'naviy xordiq beruvchi omil ham hisoblanadi.
Yoshlar o‘rtasida sof do‘stlik va hamjihatlikni shakllantirish, ular orasida sog‘lom turmush tarzini targ‘ib etish hamda yoshlarning ta'til vaqtini mazmunli o‘tkazish maqsadida Milliy gvardiya Farg‘ona viloyati bo‘yicha boshqarmasi tashabbusi bilan Qo‘qon shahar xokimligi bilan hamkorlikda sportning “triatlon” turi bo‘yicha Farg‘ona viloyati Milliy gvardiya boshqarmasi boshlig‘i Kubogi uchun musobaqa tashkil etildi.
Musobaqada “Koinot” va “Nafosat” nomli oromgoh dam oluvchilari, Qo‘qon shahrida joylashgan 2-sonli “Mehribonlik uyi” tarbiyalanuvchilari hamda Qo‘qon shaharda qizil hudud toifasiga kiritilgan mahallalarning 200 ga yaqin uyushmagan yoshlari ishtirok etdi.
Qizg‘in bellashuvlarga boy bo‘lgan mazkur musobaqada yoshlar sportning 5 km masofaga velosiped haydash, 1 km masofaga yugurish hamda 100 metrga suvda suzish turlari bo‘yicha kurash olib bordilar.
Ko‘tarinki va o‘zaro do‘stlik ruhida o‘tgan tadbir yakunida g‘olib va sovrindorlar tashkilotchilar tomonidan diplom va qimmatbaho sovg‘alar bilan taqdirlandi.
