СПОРТ ЁШЛАРНИ БИРЛАШТИРАДИ
Инсон ҳаётида спорт нафақат жисмоний тайёргарлик ва чиниқиш, балки жамоалар ва уларнинг аъзолари орасида ўзаро жипслик ва бирдамликни, аҳилликни таъминловчи, иштирокчиларга маънавий хордиқ берувчи омил ҳам ҳисобланади.
Ёшлар ўртасида соф дўстлик ва ҳамжиҳатликни шакллантириш, улар орасида соғлом турмуш тарзини тарғиб этиш ҳамда ёшларнинг таътил вақтини мазмунли ўтказиш мақсадида Миллий гвардия Фарғона вилояти бўйича бошқармаси ташаббуси билан Қўқон шаҳар хокимлиги билан ҳамкорликда спортнинг “триатлон” тури бўйича Фарғона вилояти Миллий гвардия бошқармаси бошлиғи Кубоги учун мусобақа ташкил этилди.
Мусобақада “Коинот” ва “Нафосат” номли оромгоҳ дам олувчилари, Қўқон шаҳрида жойлашган 2-сонли “Меҳрибонлик уйи” тарбияланувчилари ҳамда Қўқон шаҳарда қизил ҳудуд тоифасига киритилган маҳаллаларнинг 200 га яқин уюшмаган ёшлари иштирок этди.
Қизғин беллашувларга бой бўлган мазкур мусобақада ёшлар спортнинг 5 км масофага велосипед ҳайдаш, 1 км масофага югуриш ҳамда 100 метрга сувда сузиш турлари бўйича кураш олиб бордилар.
Кўтаринки ва ўзаро дўстлик руҳида ўтган тадбир якунида ғолиб ва совриндорлар ташкилотчилар томонидан диплом ва қимматбаҳо совғалар билан тақдирланди.
