Fargʻona viloyatida “Dog biatlon” boʻyicha Milliy gvardiya birinchiligi musobaqasi oʻtkazildi
Vazirlar Mahkamasining 2024 yildagi “Oʻzbekiston Respublikasi Qurolli Kuchlari kinologiya boʻlinmalarining faoliyatini takomillashtirish chora-tadbirlari toʻgʻrisida”gi qaroriga muvofiq, vazirlik va idoralarning kinologiya boʻlinmalarini faoliyatini takomillashtirish, naslchilik ishlari samaradorligini oshirish, veterinariya xizmati faoliyatini rivojlantirish va kinologlarni malakasini oshirish kinologiya sohasini rivojlantirishning asosiy yoʻnalishlari etib belgilandi. Shunga muvofiq Milliy gvardiya boʻlinmalarida ham kinologiya mutaxassislarining malakasini oshirish boʻyicha muntazam ravishda oʻquv yigʻinlari, harbiy xizmatchilar oʻrtasida sport musobaqalari oʻtkazilib kelinmoqda. Jumladan, Fargʻona viloyatida 4 kun davomida Milliy gvardiya kinologiya markazi va dala oʻquv maydonlarida oʻtkazilgan “Dog biatlon” boʻyicha Milliy gvardiya birinchiligi musobaqasini misol qilib keltirsak boʻladi. Unda Respublikamizning barcha viloyatlaridagi boshqarma va harbiy qismlardan tashrif buyurgan 50 ga yaqin mutaxassis kinologlar 3200 m masofaga xizmat itlari bilan birga yakka tartibda yugurib kelib, kichik kalibrli qurol bilan yotgan va tik turgan holatda quroldan oʻq otish, 300 metrli masofaga toʻsiqlarni xizmat itlari bilan yengib oʻtish, 1600 metr masofaga (estafeta) jamoa tarkibida yugurish kabi bellashuvlarda oʻzaro gʻoliblik uchun kuch sinashishdi.
Albatta ushbu musobaqa har bir harbiy xizmatchidan chaqqonlikni va zukkolikni, qolaversa, oʻzining sodiq doʻsti, hamrohini ham unutib qoʻymaslikni talab qiladi. Ushbu qoidalarga amal qilgan Fargʻona, Jizzax, Surxondaryo va Toshkent viloyatlaridan qatnashgan ishtirokchilar yakunda mos ravishda gʻoliblikni qoʻlga kiritishdi.
Musobaqaning yana bir diqqatga sazovor jihati, unda qizlarning ham ishtirok etganidir. Yigitlar bilan yelkama-yelka turib, ulardan qolishmagan tarzda shartlarni mohirona bajargan qizlar, barchada katta taassurot qoldirdi.
Musobaqa yakunida gʻolib jamoalar tashkilotchilar tomonidan kubok, diplom, medal va esdalik sovgʻalari bilan munosib taqdirlandi. Zero, har bir harbiy xizmatchi kinolog albatta vatanimizning tinchligi, osoyishtaligi va xavfsizligi yoʻlida oʻziga ishonib topshirilgan vazifalarni mohirona bajaradilar. Oʻtkazilgan musobaqa nafaqat bellashuv qolaversa, tajriba almashish yoʻlidagi koʻprik vazifasini ham oʻtab berdi.
