“Oʻzbekiston Respublikasining Jinoyat, Jinoyat-protsessual va Ma'muriy qonunchiligini zamonaviy talablar bilan uygʻunlashtirish: 30 yillik amaliy tajriba va rivojlanish istiqbollari" mavzusida xalqaro ilmiy-amaliy konferensiyasi boʻlib oʻtdi
Davlat va jamiyat taraqqiyotida huquqiy islohotlarning roli beqiyos boʻlib, ayniqsa jinoyat, jinoyat-protsessual va ma'muriy qonunchilik sohalarida chuqur oʻzgarishlar amalga oshirildi. Bu jarayon huquq ustuvorligini ta'minlash, inson huquq va erkinliklarini ishonchli himoya qilish, qonuniylik va adolat tamoyillarini mustahkamlashga xizmat qildi. Soʻnggi 30 yil davomida Oʻzbekiston Respublikasi jinoyat qonunchiligini liberallashtirish, jinoyat protsesslarini soddalashtirish, fuqarolar va tadbirkorlik subyektlarini noqonuniy bosimlardan himoya qilish hamda ma'muriy qonunchilikni zamonaviy tendensiyalarga muvofiq takomillashtirish yoʻlida muhim natijalarga erishdi. Shu bilan birga, sud-huquq tizimini mustahkamlash, huquqni muhofaza qiluvchi organlarning faoliyatini demokratik tamoyillarga moslashtirish va xalqaro standartlarga mos qonunchilik bazasini yaratish borasida keng koʻlamli islohotlar amalga oshirildi. Shu borada mustaqil Oʻzbekistonning huquqiy tizimi rivojlanish yoʻlidagi 30 yillik tajribasini ilmiy-nazariy jihatdan tahlil qilish, erishilgan natijalarni baholash hamda kelgusida amalga oshirilishi lozim boʻlgan ustuvor yoʻnalishlarni aniqlash maqsadida Oʻzbekiston Respublikasi Jamoat xavfsizligi universitetida 2025 yil 4 aprel kuni “Oʻzbekiston Respublikasining Jinoyat, Jinoyat-protsessual va Ma'muriy qonunchiligini zamonaviy talablar bilan uygʻunlashtirish: 30 yillik amaliy tajriba va rivojlanish istiqbollari” mavzusida xalqaro ilmiy-amaliy konferensiya oʻtkazildi. Mazkur konferensiyada Oʻzbekiston Respublikasi Milliy gvardiyasi, Oʻzbekiston Respublikasi Bosh prokuraturasi, Oʻzbekiston Respublikasi Oliy sudi, Oʻzbekiston Respublikasi Oliy Majlisi Qonunchilik palatasining Korrupsiyaga qarshi kurashish va sud-huquq masalalari qoʻmitasi, Toshkent davlat yuridik universiteti, Oʻzbekiston Respublikasi Huquqni muhofaza qilish Akademiyasi, Sudyalar oliy maktabi, Oʻzbekiston Respublikasi Ichki ishlar vazirligi Akademiyasi, Belarus Respublikasi Ichki ishlar vazirligi akademiyasi, Rossiya Federatsiyasi Ichki ishlar vazirligi Krasnodar davlat universiteti, Oʻzbekiston Respublikasi Oliy Majlisning Bola huquqlari boʻyicha vakili hamda Oʻzbekiston Respublikasi Jamoat xavfsizligi universiteti professor-oʻqituvchilari, doktorantlari, mustaqil izlanuvchilar va ommaviy axborot vositalari xodimlari ishtirok etdi. Konferensiya davomida jinoyat huquqini liberallashtirish, inson huquqlarini himoya qilishning huquqiy mexanizmlarini mustahkamlash, sud va huquqni muhofaza qiluvchi organlarning mustaqilligini ta'minlash, jinoyat prosessida odillik va tezkorlikni ta'minlash kabi masalalar boʻyicha muhim muhokamalar olib borildi. Bundan tashqari, iqtisodiy va korrupsiya bilan bogʻliq jinoyatlarni oldini olish, ma'muriy huquqbuzarliklar tizimini takomillashtirish va zamonaviy huquqiy tendensiyalarga mos qonunchilik islohotlarini amalga oshirish boʻyicha aniq tavsiyalar ishlab chiqildi. Tashkilotchilar va ishtirokchilar konferensiya yakunida kelgusida hamkorlikni kengaytirish, ilmiy-tadqiqot ishlarini davom ettirish va Oʻzbekiston Respublikasi Jinoyat, Jinoyat-protsessual va Ma'muriy qonunchiligini zamonaviy talablar bilan uygʻunlashtirish hamda amaliyotga tadbiq etish borasida umumiy kelishuvga erishdilar. Konferensiya ishtirokchilari va mutaxassislar tomonidan olib boriladigan ilmiy munozaralar, taqdim etilgan ma'ruzalar va muhokamalar huquqiy islohotlar samaradorligini oshirish, qonunchilikni yanada takomillashtirish va jinoyatchilikning oldini olish boʻyicha yangi yondashuvlarni ishlab chiqishga muhim hissa qoʻshadi. Konferensiyaning natijalari nafaqat ilmiy hamjamiyat uchun, balki qonunchilik jarayoni va huquqni qoʻllash amaliyoti uchun ham muhim nazariy va amaliy ahamiyat kasb etadi.
