“Ўзбекистон Республикасининг Жиноят, Жиноят-процессуал ва Маъмурий қонунчилигини замонавий талаблар билан уйғунлаштириш: 30 йиллик амалий тажриба ва ривожланиш истиқболлари" мавзусида халқаро илмий-амалий конференцияси бўлиб ўтди.
Давлат ва жамият тараққиётида ҳуқуқий ислоҳотларнинг роли беқиёс бўлиб, айниқса жиноят, жиноят-процессуал ва маъмурий қонунчилик соҳаларида чуқур ўзгаришлар амалга оширилди. Бу жараён ҳуқуқ устуворлигини таъминлаш, инсон ҳуқуқ ва эркинликларини ишончли ҳимоя қилиш, қонунийлик ва адолат тамойилларини мустаҳкамлашга хизмат қилди. Сўнгги 30 йил давомида Ўзбекистон Республикаси жиноят қонунчилигини либераллаштириш, жиноят процессларини соддалаштириш, фуқаролар ва тадбиркорлик субъектларини ноқонуний босимлардан ҳимоя қилиш ҳамда маъмурий қонунчиликни замонавий тенденцияларга мувофиқ такомиллаштириш йўлида муҳим натижаларга эришди. Шу билан бирга, суд-ҳуқуқ тизимини мустаҳкамлаш, ҳуқуқни муҳофаза қилувчи органларнинг фаолиятини демократик тамойилларга мослаштириш ва халқаро стандартларга мос қонунчилик базасини яратиш борасида кенг кўламли ислоҳотлар амалга оширилди. Шу борада мустақил Ўзбекистоннинг ҳуқуқий тизими ривожланиш йўлидаги 30 йиллик тажрибасини илмий-назарий жиҳатдан таҳлил қилиш, эришилган натижаларни баҳолаш ҳамда келгусида амалга оширилиши лозим бўлган устувор йўналишларни аниқлаш мақсадида Ўзбекистон Республикаси Жамоат хавфсизлиги университетида 2025 йил 4 апрель куни “Ўзбекистон Республикасининг Жиноят, Жиноят-процессуал ва Маъмурий қонунчилигини замонавий талаблар билан уйғунлаштириш: 30 йиллик амалий тажриба ва ривожланиш истиқболлари” мавзусида халқаро илмий-амалий конференция ўтказилди. Мазкур конференцияда Ўзбекистон Республикаси Миллий гвардияси, Ўзбекистон Республикаси Бош прокуратураси, Ўзбекистон Республикаси Олий суди, Ўзбекистон Республикаси Олий Мажлиси Қонунчилик палатасининг Коррупцияга қарши курашиш ва суд-ҳуқуқ масалалари қўмитаси, Тошкент давлат юридик университети, Ўзбекистон Республикаси Ҳуқуқни муҳофаза қилиш Академияси, Судьялар олий мактаби, Ўзбекистон Республикаси Ички ишлар вазирлиги Академияси, Беларус Республикаси Ички ишлар вазирлиги академияси, Россия Федерацияси Ички ишлар вазирлиги Краснодар давлат университети, Ўзбекистон Республикаси Олий Мажлиснинг Бола ҳуқуқлари бўйича вакили ҳамда Ўзбекистон Республикаси Жамоат хавфсизлиги университети профессор-ўқитувчилари, докторантлари, мустақил изланувчилар ва оммавий ахборот воситалари ходимлари иштирок этди. Конференция давомида жиноят ҳуқуқини либераллаштириш, инсон ҳуқуқларини ҳимоя қилишнинг ҳуқуқий механизмларини мустаҳкамлаш, суд ва ҳуқуқни муҳофаза қилувчи органларнинг мустақиллигини таъминлаш, жиноят просессида одиллик ва тезкорликни таъминлаш каби масалалар бўйича муҳим муҳокамалар олиб борилди. Бундан ташқари, иқтисодий ва коррупция билан боғлиқ жиноятларни олдини олиш, маъмурий ҳуқуқбузарликлар тизимини такомиллаштириш ва замонавий ҳуқуқий тенденцияларга мос қонунчилик ислоҳотларини амалга ошириш бўйича аниқ тавсиялар ишлаб чиқилди. Ташкилотчилар ва иштирокчилар конференция якунида келгусида ҳамкорликни кенгайтириш, илмий-тадқиқот ишларини давом эттириш ва Ўзбекистон Республикаси Жиноят, Жиноят-процессуал ва Маъмурий қонунчилигини замонавий талаблар билан уйғунлаштириш ҳамда амалиётга тадбиқ этиш борасида умумий келишувга эришдилар. Конференция иштирокчилари ва мутахассислар томонидан олиб бориладиган илмий мунозаралар, тақдим этилган маърузалар ва муҳокамалар ҳуқуқий ислоҳотлар самарадорлигини ошириш, қонунчиликни янада такомиллаштириш ва жиноятчиликнинг олдини олиш бўйича янги ёндашувларни ишлаб чиқишга муҳим ҳисса қўшади. Конференциянинг натижалари нафақат илмий ҳамжамият учун, балки қонунчилик жараёни ва ҳуқуқни қўллаш амалиёти учун ҳам муҳим назарий ва амалий аҳамият касб этади.
