Milliy gvardiya Ma'naviyat va ma'rifat markazida “Buyuklar haqida 100 ta dalil” kitoblar jamlanmasining taqdimoti o‘tkazildi.
Joriy yilda Respublika Ma'naviyat va ma'rifat markazi bilan Milliy gvardiya o‘rtasida hamkorlikning istiqbolli rejalari yuzasidan memorandum imzolanib, unga asosan Milliy gvardiya bo‘linmalarida shaxsiy tarkib ishtirokida bir qator ma'naviy-ma'rifiy tadbirlar o‘tkazib kelinmoqda.
Respublika Ma'naviyat va ma'rifat markazi tomonidan “O‘zbekiston tarixi” telekanali hamda O‘zbekiston Respublikasi Fanlar akademiyasi hamkorligida tayyorlangan “Buyuklar haqida 100 ta dalil” kitoblar jamlanmasining ilk taqdimoti Milliy gvardiya Ma'naviyat va ma'rifat markazida tizimdagi yoshlar bilan birgalikda o‘tkazildi.
Tadbirda Milliy gvardiya qo‘mondoni o‘rinbosari polkovnik S. Mamayusupov, Respublika Ma'naviyat va ma'rifat markazi rahbari O. Xasanov, Oliy Majlis Qonunchilik palatasi deputati O. Abdullaeva va mazkur kitobni jamlashda qatnashgan ijodkorlar ishtirok etdi.
Tadbirda so‘zga chiqqanlar tomonidan ushbu kitob insonning ruhiy ozuqa manbai, qalbni poklashi, fikrni ravshan qilishi va dunyoqarashni kengaytirishiga alohida urg‘u berildi.
Yurtboshimiz ta'biri bilan aytganda, “Ma'naviyatsiz jamiyat – tomiri qurib borayotgan daraxtga o‘xshaydi”. Kitob insonni intizomli qiladi. Nafsni yengishga va kattani hurmat, kichikni izzat qilishga o‘rgatadi. Kitob o‘qigan kishi qonunlarga itoat qilish kerakligini anglaydi.
Taqdimot qilinayotgan mazkur kitobning ham yoshlar tarbiyasida muhim o‘rini bo‘lib, ushbu kitob yoshlar uchun ibrat maktabi, kattalar uchun esa fikr-mulohaza manbai bo‘lib xizmat qiladi. Uning sahifalarida olib borilgan g‘oyaviy-tarbiyaviy yo‘nalishlar bugungi kunning dolzarb masalalariga javob bo‘la oladi.
Kitob 8 ta tilda chop etilgan bo‘lib, unda QR havola orqali ma'lumotlarni eshitish va ko‘rish imkoniyati mavjud.
Tadbirning yana bir ahamiyatli jihati shunda bo‘ldiki, mamlakatimizda haftaning har juma kuni Milliy liboslar kuni hisoblangani bois, aksariyat ishtirokchilar ushbu kitobni milliy liboslarda qarshi olishdi. Taqdimot davomida Milliy gvardiya ashula va raqs ansambli xonandalari o‘zlarining dilga xush yoquvchi navolari bilan kechaga o‘zgacha shukuh bag‘ishladi.
Zero, barchamizga ma'lum haqiqat borki, kitobni targ‘ib qilish – ma'naviyatni targ‘ib qilishdir. O‘tkazilgan ushbu tadbir ham harbiy xizmatchilar, ularning oila a'zolari qalbida kitobga muhabbat uyg‘otish, ma'rifatga bo‘lgan ehtiyojni kuchaytirishga xizmat qildi, desak mubolag‘a bo‘lmaydi.
