“BAXSHICHILIK SANʼATI” BO‘YICHA KO‘RIK TANLOV VILOYAT BOSQICHI G‘OLIBLARI SURXONDARYODA
O‘tgan oy mobaynida Milliy gvardiya barcha hududiy bo‘linma va muassasalarida “Baxshichilik sanʼati” bo‘yicha ko‘rik tanlovning viloyat bosqichlari ko‘tarinki ruhda o‘tkazildi.
Hayʼat aʼzolarining odilona hukmiga ko‘ra saralash bosqichlarida g‘oliblikni qo‘lga kiritgan harbiy xizmatchi va xodimlar kecha mamlakatimizning janubidagi gavhari Surxondaryo viloyati markazi Termiz shahrida jam bo‘ldilar.
Milliy gvardiyasi Surxondaryo viloyati bo‘yicha boshqarmasi masʼul rahbarlari hamda viloyat hokimligi masʼullari, Termiz temiryo‘l vokzalida ishtirokchilarni tantanali ravishda kutib olishdi.
Ishtirokchilar uchun Termiz shahrining diqqatga sazovor joylariga sayohat tashkil etilib, Surxon vohasining o‘tmishi, boy madaniy meʼrosi, qadriyatlari va tarixiga oid batafsil maʼlumotlar bilan yaqindan tanishtirildi. Bu jarayonda “Al Hakim At Termiziy”, “Sulton Saodat” tarixiy majmualariga borilib, ajdodlarimizning porloq xotirasi yodga olindi.
Shuningdek, “Termiz arxeologiya muzeyi” hamda “Madaniyat va tarix muzeyiga” tashrif buyurib, muzey eksponatlaridan joy olgan noyob ashyo va kolleksiyalarda xalqimizning ming yillik anʼanalari, qadriyatlari aks etganligining guvohi bo‘ldilar. Hozirda barcha tadbir qatnashchilari final bosqichga qizg‘in tayyorgarlik ko‘rishmoqda.
