Buxoro viloyatida V xalqaro jamoaviy uloq-koʻpkari turniri bo'lib o'tdi
Oʻzbekiston Respublikasi Prezidentining 2021-yil 5-avgustdagi PQ-5213-son qaroriga muvofiq, har yili “Navroʻz” umumxalq bayrami arafasida Qorabayir zotli otlar ishtirokida Xalqaro uloq-koʻpkari turniri oʻtkazib kelinmoqda. Mazkur anʼanaviy musobaqa milliy sport turlarini ommalashtirish, chavandozlik madaniyatini rivojlantirish va xalqaro sport aloqalarini mustahkamlashda muhim ahamiyat kasb etmoqda.
Joriy yilda ham ushbu nufuzli musobaqa 3 kun mobaynida Buxoro viloyatining Buxoro tumanida joylashgan Milliy gvardiya “Chavandozlar maktabi” hududida oʻtkazildi.
Yildan yilga nufuzi tobora ortib borayotgan beshinchi bor oʻtkazilgan Xalqaro jamoaviy uloq-koʻpkari turnirida Rossiya, Xitoy, Qozogʻiston, Qirgʻiz Respublikasi davlatlari hamda Oʻzbekistondan ikkita jamoa ishtirok etishdi.
Turnir oldingilariga qaraganda ham shiddatli oʻtdi. Har bir bellashuv murosasiz bahslarga boy boʻldi. Yakunda Qozogʻiston jamoasi Qirgʻiz respublikasi termasi bilan finalga yoʻl oldi. Oʻzbekistonning ikkita jamoasi esa bir birlari bilan 3-oʻrin uchun maydonda ot choptirishdi.
V xalqaro jamoaviy uloq-koʻpkari turnirining kubogi Qozogʻiston polvonlariga nasib etdi. Ikkinchi oʻrinni esa Qirgʻiziston va 3-oʻrinni Oʻzbekiston terma jamoalari qoʻlga kiritishdi.
Turnirning tantanali taqdirlash marosimi ham alohida bayramona tarzda tashkil etildi. Chavandozlar maktabi hududiga kirib kelishdanoq kamondan otish, arqon tortish, tosh koʻtarish, oʻzbek jang sanʼati, qoʻl jangi hamda tekvando kabi sport turlari boʻyicha musobaqa va koʻrgazmali chiqishlar turnirga tashrif buyurgan sportchilar, mehmonlar hamda turistlar qamrab oldi. Bolajonlar uchun varrak uchirish uchun ham imkoniyat yaratildi. Yana boshqa tomonda esa milliy hunarmandchilik namunalari koʻrgazmasi va sumalak sayllari tashkil etildi. Hudud batamom milliy koloritimizga burkandi.
Turnirning tantanali taqdirlash marosimida Sport vaziri oʻrinbosari SH.Mahmudov, Milliy gvardiya qoʻmondoni oʻrinbosari S.Mamayusupov, Buxoro viloyat hokimi B.Zaripov, Oʻzbekiston uloq-koʻpkari federatsiyasi raisi R.Adhamovlar hamda viloyat huquqni muhofaza qilish idoralari rahbarlari, xorijlik mehmonlar, sportchilar, OAV vakillari va blogerlar ishtirok etishib, final uchrashuvini kuzatib borishdi.
Taqdirlash marosimida gʻolib va sovrindorlarga 100. 75. 50 mln. soʻmlik vaucherlar, diplom va medallar tantanali tarzda tashkilotchilar tomonidan topshirildi.
Mazkur turnir Xitoy, Qozogʻiston, Rossiya, Qirgʻiz Respublikalaridan tashrif buyurgan telekanallari muxbirlari hamda blogerlari tomonidan yoritib borildi.
Maʼlumot oʻrnida, ushbu turnir 2022 va 2023-yillarda Surxondaryo viloyatida, 2024-yilda Fargʻona viloyatida hamda 2025-yilda Namangan viloyatida koʻtarinki ruh va yuqori tashkiliy saviyada oʻtkazilgan. Joriy yilgi musobaqa ham milliy qadriyatlarimizni keng targʻib qilish, chavandozlik anʼanalarini asrab-avaylash va sport sohasidagi xalqaro hamkorlikni yanada mustahkamlashga xizmat qildi.
