Хоразм вилоятида хизмат ўтаётган ҳарбий хизматчи ва ходимлар ҳамда уларнинг оила аъзолари, тизим фахрийлари, шунингдек, маҳаллий аҳоли иштирокида оммавий сайёр қабул ўтказилди
Республика Ҳарбий прокуратураси томонидан Қуролли Кучлар тизимидаги вазирлик ва идоралари билан ҳамкорликда Урганч шаҳрида жойлашган Ёшлар маркази биносида Урганч гарнизонидаги ҳарбий қисм ва муассасалар ҳарбий хизматчилари, уларнинг оила аъзолари, ҳарбий пенсионерлар ва фуқаролар иштирокида оммавий сайёр қабул ўтказилди.
Унда Республика Ҳарбий прокурорининг ўринбосари Қахрамон Исроилов, Мудофаа вазирининг ўринбосари Ҳамдам Қаршиев, Миллий гвардия қўмондонининг ўринбосари Сарвар Мамаюсупов ҳамда Қорақалпоғистон Республикаси Халқ қабулхонаси раҳбарияти ва бошқа мутасадди ташкилотлар, банк, мактабгача таълим, халқ таълими, соғлиқни сақлаш, бандлик бошқармалари, коммунал соҳа ва бошқа ташкилотлар масъуллари қатнашди.
Оммавий сайёр қабулда 210 нафардан ортиқ ҳарбий хизматчилар ва уларнинг оила аъзолари, ҳарбий пенсионерлар ва бошқа фуқаролар қатнашиб, уларнинг айримлари ўзларини қийнаётган муаммолари билан мутасаддиларга мурожаат қилдилар.
Қабул давомида 130 та мурожаат келиб тушди, шундан 52 таси жойида ижобий ҳал қилинди, 32 таси бўйича тушунтиришлар берилди ҳамда 46 та мурожаат ижроси алоҳида назоратга олинди.
Шунингдек, қабул давомида ҳарбий хизматчиларнинг ногиронлиги бўлган фарзандларига совға-соламлар берилди.
