Yurtimizda “Muzeylar haftaligi” boʻlib oʻtmoqda. Mazkur haftalik davomida Milliy gvardiya qoʻmondonligi tomonidan ham gvardiyachilarning milliy muzey fondida saqlanayotgan noyob ashyolar va qimmatli kolleksiyalar bilan yaqindan tanishishi, boy tarixiy va madaniy merosimizdan bahramand boʻlishlarini taʼminlash maqsadida qator tadbirlar tashkil etilmoqda.
Prezidentimizning 2024-yil 19-iyuldagi "Siyosiy qatagʻon qurboni boʻlgan yurtdoshlarimiz hayoti va faoliyatini oʻrganish, targʻib etish hamda ularni xotirasini abadiylashtirish borasidagi ishlarni kengaytirish toʻgʻrisida"gi 270-sonli qarorida belgilangan vazifalar ijrosini taʼminlash doirasida Milliy gvardiya va Oʻzbekiston Respublikasi Vazirlar Mahkamasi huzuridagi Qatagʻon qurbonlari xotirasi davlat muzeyi oʻrtasida hamkorlik memorandumi imzolandi.
Mazkur memorandumda gvardiyachilar va ularning oila aʼzolari bilan Siyosiy qatagʻon qurbonlarining hayoti va merosini chuqur oʻrganishga qaratilgan tadbirlarni yanada jadallashtirish, arxiv materiallari, yodnomalar va tarixiy manbalar asosida maʼrifiy tadbirlar, koʻrgazmalar, qoʻshiqlar tayyorlash, harbiy qism va muassasalarda maxsus maʼruza darslari, konferensiyalar va faxriy uchrashuvlar tashkil etish kabilar koʻzda tutilgan.
Shundan soʻng, gvardiyachilar va kursantlar hamda Temurbeklar maktabi oʻquvchilari uchun muzeyga ekskursiya tashkil etildi. Shu bilan birga qatagʻon qurbonlari hayot yoʻli aks ettirilgan video filmlar namoyish etildi va Milliy gvardiya Ashula va raqs ansambli xonandalarining vatan haqidagi qoʻshiqlari hamda Jamoat xavfsizligi universiteti katta ofitseri Shuxratxon Muxammatxonovning “Yurt shahidlari” va “Jadidlar” kompozitsiyalari yigʻilganlarga havola etildi.
Shuni taʼkidlab oʻtishimiz kerakki, siyosiy qatagʻon qurbonlarining hayoti va faoliyatini oʻrganish, ularning nomini abadiylashtirish — bu faqat tarixiy burch emas. Bu – milliy faxr, xalq xotirasiga hurmat, va istiqlol gʻoyalariga sadoqat ramzidir.