“AMIRSOY POLO CUP 2022” MUSOBAQASI: MILLIY GVARDIYA TOSHKENT SHAHAR JAMOASI FAXRLI 1-O‘RINDA
Joriy yilning 9 yanvar kuni Amirsoy tog‘ kurorti hududida 2200 metr balandlikda qor ustida ot polosi bo‘yicha "Amirsoy Polo Cup 2022" musobaqasi bo‘lib o‘tdi. Musobaqada NRG Polo, Milliy gvardiya ot sporti bo‘yicha Respublika oliy sport mahorati maktabi, OFB Polo va Milliy gvardiya Toshkent shahri bo‘yicha boshqarmasi mahoratli chavandozlaridan iborat bo‘lgan jami 4 ta jamoa ishtirok etdi. Bahslar 4 daqiqadan 4 taym davom etdi. Birinchi yarim final bahsida Milliy gvardiya ot sporti maktabi jamoasi sportchilari OFB Polo jamoasiga 8:1 natijasi bilan hisobni boy berdi.
Keyingi bahslarda Milliy gvardiya jamoasi NRG Polo jamoasi sportchilarini 2:1 hisobida mag‘lubiyatga uchratdi.
Musobaqaning final bosqichi uchun kechgan bahsda Milliy gvardiya jamoasi 3:1 hisobida OFB Polo jamoasini ham mag‘lubiyatga uchratib, musobaqa g‘olibiga aylandi.
Mohir chavandozlar milliy qadriyatlarimizga bo‘lgan hurmati va ulug‘ ajdodlarimizga xos mardlik va jasoratlarini namoyon etib, ushbu musobaqani hayajon bilan tomosha qilgan yoshlar qalbida ot sportiga bo‘lgan qiziqishlarini uyg‘ota olishdi.
Olqishlar ostida o‘tgan musobaqa yakunida g‘olib va sovrindorlarga kubok hamda qimmatbaho sovg‘alar topshirildi.
