Davlatimiz rahbari boshchiligida joriy yilning 5 fevral kuni o‘tkazilgan ijtimoiy sohadagi ustuvor vazifalarga bag‘ishlangan yig‘ilishda maktablardagi inspektor-psixologlar shtati Ichki ishlar vazirligidan Milliy gvardiya tizimiga o‘tkazildi.

Inspektor-psixologlarning asosiy vazifasi, o‘quvchilarning taʼlim-tarbiyasini tashkil etishda maktab jamoalariga yaqindan ko‘maklashish, muntazam dars qoldiruvchi o‘quvchilarning ota-onalari bilan ishlashdan iborat.

Ushbu vazifalarni samarali ijro etilishini taʼminlash maqsadida Milliy gvardiyaning respublikamiz bo‘yicha boshqarmalarida inspektor-psixologlar uchun seminar mashg‘ulotlari o‘tkazilib, ularga Milliy gvardiyaga qabul qilinganligi bo‘yicha xizmat guvohnomalari topshirilmoqda.

Ana shunday tadbirlarning navbatdagisi Milliy gvardiya Surxondaryo viloyati bo‘yicha boshqarmasida bo‘lib o‘tdi. Unda 85 nafar inspektor-psixologlarga Milliy gvardiya xizmat guvohnomalari topshirildi.

Shuni alohida taʼkidlashimiz kerakki, endilikda maktab direktorlarining maʼnaviy-maʼrifiy ishlar, Chaqiriqqa qadar yoshlarni tayyorlash bo‘yicha o‘rinbosarlari, psixolog va sinf rahbarlarining o‘quvchilar maʼnaviyatini yuksaltirish va darslardagi ishtiroki, taʼlim-tarbiya ishlarini hamohang tashkil etishga doir masʼuliyati yana-da oshiriladi. Ota-onalar va mahalla faollari ishtirokidagi “maktab — ota-ona — mahalla” hamkorligi uzviy tashkil etiladi.

O‘quvchilarning darsda muntazam ishtirokini taʼminlash, ularning bo‘sh vaqtlarini mazmunli o‘tkazishlari uchun to‘garak va mashg‘ulotlarni ko‘paytirish, ushbu jarayonlarga ota-onalar va hududdagi faol fuqarolarni keng jalb etish bo‘yicha manzilli ishlar olib boriladi.