30-iyun - Yoshlar kuni munosabati bilan «Butunjahon yoshlar festivali‘ doirasida poytaxtimizdagi Yoshlar ijod saroyi hududida tashkil etilgan Yoshlar shaharchasi Jasorat ko‘chasida Milliy gvardiyaning “Temurbeklar maktabi”,Temurbeklar hamda “Kamondan otish” pavilyonlari yoshlar uchun bir qator madaniy-maʼnaviy dasturlar, tanlovlar, musobaqalar o‘tkazmoqda.

Xususan, bugun bo‘lib o‘tgan tadbirlar ham yoshlarimizda juda katta taassurot qoldirdi.

Sana munosabati bilan “Yangi O‘zbekiston yoshlari birlashaylik!” shiori ostida bo‘lib o‘tgan madaniy tadbirda Milliy gvardiya harbiy xizmatchilari, ularning oila aʼzolari, mahalliy yoshlar va sportchilar ishtirok etdi.

Tantanali tadbir “Milliy gvardiyam” qo‘shig‘i bilan start olib, Milliy gvardiya ashula va raqs ansambli xonandalari tomonidan ushbu qo‘shiq faxr va iftixor bilan ijro etildi.

Milliy gvardiya Namunali harbiy orkestr jamoasining musiqiy chiqishlari bo‘lsa, barchaga ko‘tarinki kayfiyat bag‘ishladi desak mubolag‘a bo‘lmaydi. Chunki, musiqaning har bir ohangiga Vatan madhi singdirilgan.

Jamoat xavfsizligi universiteti kursantlarining qo‘l jangi hamda Milliy gvardiya Faxriy qorovul batalyonining ko‘rgazmali chiqishlari bo‘lsa, o‘quvchi-yoshlarda harbiy vatanparvarlik, yurtga sadoqat tuyg‘ularini mavjlantirdi desak adashmaymiz.

Ayniqsa, Parij-2024 XXXIII “Yozgi olimpiya” o‘yinlari litsenziyatlari O‘zbekiston kamondan otish milliy terma jamoasi aʼzolari Sodiqov Amirxon va Abdusattarova Ziyodaxonlarning sahnaga taklif etilishi, aksariyat tomoshabinlarda kamondan otish sportiga qiziqish uyg‘otdi. “Jadidlar qasidasi” hamda unga sahnalashtirilgan chiqishlar tomoshabinlar ko‘nglidan chuqur joy oldi.