30-июнь - Ёшлар куни муносабати билан «Бутунжаҳон ёшлар фестивали'' доирасида Миллий гвардия томонидан “Ёшлар шаҳарчаси”да бир қатор ватанпарварлик павильонлари ташкил этилиб, мамлакатимиз ёшлари учун байрам дастурлари ташкил этилмоқда
30-июнь - Ёшлар куни муносабати билан «Бутунжаҳон ёшлар фестивали'' доирасида пойтахтимиздаги Ёшлар ижод саройи ҳудудида ташкил этилган Ёшлар шаҳарчаси Жасорат кўчасида Миллий гвардиянинг “Темурбеклар мактаби”,Темурбеклар ҳамда “Камондан отиш” павильонлари ёшлар учун бир қатор маданий-маънавий дастурлар, танловлар, мусобақалар ўтказмоқда.
Хусусан, бугун бўлиб ўтган тадбирлар ҳам ёшларимизда жуда катта таассурот қолдирди.
Сана муносабати билан “Янги Ўзбекистон ёшлари бирлашайлик!” шиори остида бўлиб ўтган маданий тадбирда Миллий гвардия ҳарбий хизматчилари, уларнинг оила аъзолари, маҳаллий ёшлар ва спортчилар иштирок этди.
Тантанали тадбир “Миллий гвардиям” қўшиғи билан старт олиб, Миллий гвардия ашула ва рақс ансамбли хонандалари томонидан ушбу қўшиқ фахр ва ифтихор билан ижро этилди.
Миллий гвардия Намунали ҳарбий оркестр жамоасининг мусиқий чиқишлари бўлса, барчага кўтаринки кайфият бағишлади десак муболаға бўлмайди. Чунки, мусиқанинг ҳар бир оҳангига Ватан мадҳи сингдирилган.
Жамоат хавфсизлиги университети курсантларининг қўл жанги ҳамда Миллий гвардия Фахрий қоровул батальонининг кўргазмали чиқишлари бўлса, ўқувчи-ёшларда ҳарбий ватанпарварлик, юртга садоқат туйғуларини мавжлантирди десак адашмаймиз.
Айниқса, Париж-2024 XXXIII “Ёзги олимпия” ўйинлари лицензиятлари Ўзбекистон камондан отиш миллий терма жамоаси аъзолари Содиқов Амирхон ва Абдусаттарова Зиёдахонларнинг саҳнага таклиф этилиши, аксарият томошабинларда камондан отиш спортига қизиқиш уйғотди. “Жадидлар қасидаси” ҳамда унга саҳналаштирилган чиқишлар томошабинлар кўнглидан чуқур жой олди.
