Aholi muammolarini o‘rganish va ularni yechimini topish, hududlarda kriminogen vaziyat barqarorligini taʼminlash yuzasidan Davlatimiz rahbarining topshiriqlariga asosan Milliy gvardiya qo‘mondoni general-mayor R. Djurayev boshchiligidagi idoralararo ishchi guruh joriy yilning 6 mart kunidan Samarqand viloyatida o‘z faoliyatini boshladi
Tadbir mobaynida Ishchi guruh tomonidan viloyat aholisining ijtimoiy-maishiy muammolarini aniqlash va bartaraf etish, sog‘liqni saqlash, jamoat tartibini va fuqarolar xavfsizligini taʼminlash, huquqni muhofaza qilish hamda kriminogen vaziyatni yana-da barqarorlashtirish, shuningdek aholi bandligi va tadbirkorlar uchun yaratilgan sharoitlar kabi dolzarb masalalarga asosiy eʼtibor qaratilmoqda.
Bugun Milliy gvardiya qo‘mondoni R.Djurayev hamda viloyat hokimi E.Turdimov raisligida video-selektor tarzidagi yig‘ilish bo‘lib o‘tdi. Unda O‘zbekiston Respublikasi Prezidenti Administratsiyasi, Ichki ishlar va Adliya vazirliklari, Bosh prokuratura, uning huzuridagi Departament, Soliq qo‘mitasidan rahbar va masʼul xodimlar, shuningdek, viloyat sektor rahbarlari, Milliy gvardiyaning sohaviy xizmatlari hamda boshqa mutasaddi idoralar masʼullari ishtirok etishdi.
Yig‘ilishda aholining muammolarini o‘rganish va ularni bartaraf etishda, ishchi guruhga viloyatning barcha mutasaddi rahbarlari yaqindan yordam ko‘rsatishi, aniqlangan muammolarni bartaraf etishga qaratilgan asosli takliflarini tezkor shtabga taqdim etishlari yuzasidan topshiriqlar berildi.
Shundan so‘ng, Milliy gvardiya qo‘mondoni viloyat hokimi bilan birgalikda joylarga chiqib, aholi bandligi va tadbirkorlar uchun yaratilgan sharoitlarlar holati, IT yo‘nalishida yoshlar uchun yaratilgan shart-sharoitlar hamda ushbu yo‘nalishlarda aniqlangan muammolarni tizimli yechimini topish va bartaraf etish bo‘yicha tashkil etilgan ishchi guruhning tezkor shtab faoliyati bilan tanishdilar.
Shuningdek, tuman va mahallalarda faoliyati yo‘lga qo‘yilgan “beshlik”ning aholi murojaatlari bilan ishlash ahvoli o‘rganilib, masʼullarga tegishli vazifalar belgilandi.
Idoralararo ishchi guruh faoliyati Samarqand viloyatida davom etmoqda.
