Buyuk va mutafakkir shoir, davlat arbobi Alisher Navoiy, shoh va shoir, olim Zahiriddin Muhammad Bobur tavalludlari munosabati bilan joylarda qator adabiy-maʼrifiy kechalar, yoshlarning yozuvchi va shoirlar bilan uchrashuvlari o‘tkazilmoqda.

Fevral oyining avvalida ikki buyuk shoir va mutafakkir, so‘z mulkining sultoni Alisher Navoiy, undan so‘ng, shoh va shoir Zahiriddin Muhammad Bobur bobolarimizning tavallud ayyomlarining keng nishonlanishi, ularning bitmas tuganmas maʼnaviy xazinalariga murojaat etishimiz ongu shuurimizga muhrlangan. Milliy gvardiya Toshkent viloyatida joylashgan bo‘linma harbiy xizmatchilari ham adabiyotimizning ustunlari bo‘lmish ikki ijodkorning maʼnaviyatimiz xazinasiga qo‘shgan ulkan hissasi bilan yaqindan tanishish maqsadida adabiy-maʼrifiy kecha tashkil etishdi. Ular tadbirga kirish oldidan, poytaxtimizdagi Adiblar xiyobonida qad rostlagan Alisher Navoiy va Zahiriddin Muhammad Bobur haykallari oldida O‘zbekiston yozuvchilar uyushmasi aʼzolari, shoir va yozuvchilar bilan uchrashuvlarda ishtirok etishdi.

Shundan so‘ng, tadbirning ikkinchi qismiga o‘tildi. G‘azal mulkining sultoni Alisher Navoiy tavalludining 582 hamda Zahiriddin Muhammad Bobur tavalludining 540 yilligiga bag‘ishlangan intellektual viktorinada harbiy qismdan 6 ta jamoa ishtirok etdi. Ular ikkita shart: jamoani tanishtirish va savol javoblar bahsida o‘zaro bilimlarini sinovdan o‘tkazishdi. Sahna ko‘rinishlari, teatrlashtirilgan tomoshalar bilan tadbirda ikki buyuk siymoning hayoti va ijodi jonli aks ettirildi. Intellektual viktorinaning shaffofligini taʼminlash maqsadida O‘zbekiston fanlar Akademiyasi Temuriylar tarixi muzeyi ekspertlari tomonidan tuzilgan savol javoblar harbiy xizmatchilarga taqdim etildi va baholab borildi.

Shuningdek, kecha so‘ngida buyuk shoir, qomusiy olim, davlat arbobi va mohir sarkarda Zahiriddin Muhammad Boburning beqiyos ilmiy-ijodiy merosi milliy madaniyatimiz va xalqimiz adabiy-estetik tafakkurining shakllanishida, jahon adabiyoti, ilm-fani va davlatchiligi tarixida tutgan o‘rni haqida insholar tanlovi ham o‘tkazildi.