Алишер Навоий ҳамда Заҳириддин Муҳаммад Бобур таваллудлари муносабати билан адабий-маърифий кеча ва интеллектуал викториналар ўтказилди
Буюк ва мутафаккир шоир, давлат арбоби Алишер Навоий, шоҳ ва шоир, олим Заҳириддин Муҳаммад Бобур таваллудлари муносабати билан жойларда қатор адабий-маърифий кечалар, ёшларнинг ёзувчи ва шоирлар билан учрашувлари ўтказилмоқда.
Февраль ойининг аввалида икки буюк шоир ва мутафаккир, сўз мулкининг султони Алишер Навоий, ундан сўнг, шоҳ ва шоир Заҳириддин Муҳаммад Бобур боболаримизнинг таваллуд айёмларининг кенг нишонланиши, уларнинг битмас туганмас маънавий хазиналарига мурожаат этишимиз онгу шууримизга муҳрланган. Миллий гвардия Тошкент вилоятида жойлашган бўлинма ҳарбий хизматчилари ҳам адабиётимизнинг устунлари бўлмиш икки ижодкорнинг маънавиятимиз хазинасига қўшган улкан ҳиссаси билан яқиндан танишиш мақсадида адабий-маърифий кеча ташкил этишди. Улар тадбирга кириш олдидан, пойтахтимиздаги Адиблар хиёбонида қад ростлаган Алишер Навоий ва Заҳириддин Муҳаммад Бобур ҳайкаллари олдида Ўзбекистон ёзувчилар уюшмаси аъзолари, шоир ва ёзувчилар билан учрашувларда иштирок этишди.
Шундан сўнг, тадбирнинг иккинчи қисмига ўтилди. Ғазал мулкининг султони Алишер Навоий таваллудининг 582 ҳамда Заҳириддин Муҳаммад Бобур таваллудининг 540 йиллигига бағишланган интеллектуал викторинада ҳарбий қисмдан 6 та жамоа иштирок этди. Улар иккита шарт: жамоани таништириш ва савол жавоблар баҳсида ўзаро билимларини синовдан ўтказишди. Саҳна кўринишлари, театрлаштирилган томошалар билан тадбирда икки буюк сиймонинг ҳаёти ва ижоди жонли акс эттирилди. Интеллектуал викторинанинг шаффофлигини таъминлаш мақсадида Ўзбекистон фанлар Академияси Темурийлар тарихи музейи экспертлари томонидан тузилган савол жавоблар ҳарбий хизматчиларга тақдим этилди ва баҳолаб борилди.
Шунингдек, кеча сўнгида буюк шоир, қомусий олим, давлат арбоби ва моҳир саркарда Заҳириддин Муҳаммад Бобурнинг беқиёс илмий-ижодий мероси миллий маданиятимиз ва халқимиз адабий-эстетик тафаккурининг шаклланишида, жаҳон адабиёти, илм-фани ва давлатчилиги тарихида тутган ўрни ҳақида иншолар танлови ҳам ўтказилди.
---------
Бугун Алишер Навоий номидаги Ўзбекистон Миллий кутубхонасида ҳарбий хизматчилар, адабиётшунос олимлар, шоир ва ижодкорлар ҳамда ўқувчи ёшлар иштирокида навоийхонлик кечаси ўтказилди.
Тадбир давомида ташриф буюрган меҳмонлар истиқлолнинг дастлабки йилларидан миллий ўзлигимизни англаш, буюк аждодларимиз номини тиклаш, маънавий меросини асраб-авайлаш ва тарғиб этишга алоҳида эътибор қаратилган бўлса, бугунги кунда муҳтарам Президентимиз Шавкат Мирзиёев ташаббуси билан юртимизда китобхонлик маданияти муҳим воқеликка айланаётганини, Мир Алишер Навоий бобомизнинг тенгсиз маънавий мероси бугунги ёшлар ва келажак авлодлар учун ҳам ҳаёт мактаби бўлишини алоҳида таъкидладилар.
Бугунги тадбиримизда ҳам ёш авлод томонидан ғазаллар, саҳна кўринишлари намойиш этилди.
