Қашқадарё вилоятида пиротехника воситаларининг ноқонуний айланмасига алоқадор бўлган шахслар аниқланди
4 декабрь куни Қарши шаҳрида тунги вақтдаги профилактик тадбирлар давомида Миллий гвардия Қашқадарё вилояти бўйича бошқармаси ҳарбий хизматчилари томонидан 22 ёшли О. Х.нинг пиротехника воситалари савдоси билан шуғулланаётганлиги аниқланди. Ушбу шахсдан умумий қиймати 1 млн 800 минг сўм бўлган 10 блок петарда “Трение” деб номланувчи пиротехника воситаси олиб қўйилди.
Ўша куннинг ўзида Қарши шаҳрида тахминан соат 21.00 да Миллий гвардия ҳарбий хизматчилари Божхона қўмитасининг вилоят бошқармаси ходимлари билан биргаликда яна бир пиротехника воситалари савдоси билан шуғулланаётган шахс аниқланди. Қарши шаҳри “Зоғза” МФЙ да яшовчи ушбу шахсдан сертификатланмаган ва умумий қиймати 25 млн сўм бўлган пиротехника воситаси олиб қўйилди.
Ҳурматли фуқаролар, эслатиб ўтамиз, Ўзбекистон Республикаси Маъмурий жавобгарлик кодексининг 185-1 моддасида пиротехника буюмларини қонунга хилоф равишда ишлаб чиқариш, тайёрлаш, сақлаш, ташиш, жўнатиш, улардан фойдаланиш, уларни қонунга хилоф равишда Ўзбекистон Республикасига олиб кириш, ушбу ҳуқуқбузарлик ашёларини мусодара қилиш билан биргаликда базавий ҳисоблаш миқдорининг беш бараваридан йигирма бараваригача миқдорда жарима солишга сабаб бўлиши белгиланган.
Ёдда тутинг, сертификатланмаган пиротехника воситалари сизнинг ва болаларингиз соғлиғига жиддий хавф солади.
