Qashqadaryo viloyatida pirotexnika vositalarining noqonuniy aylanmasiga aloqador bo‘lgan shaxslar aniqlandi
4 dekabr kuni Qarshi shahrida tungi vaqtdagi profilaktik tadbirlar davomida Milliy gvardiya Qashqadaryo viloyati bo‘yicha boshqarmasi harbiy xizmatchilari tomonidan 22 yoshli O. X.ning pirotexnika vositalari savdosi bilan shug‘ullanayotganligi aniqlandi. Ushbu shaxsdan umumiy qiymati 1 mln 800 ming so‘m bo‘lgan 10 blok petarda “Treniye” deb nomlanuvchi pirotexnika vositasi olib qo‘yildi.
O‘sha kunning o‘zida Qarshi shahrida taxminan soat 21.00 da Milliy gvardiya harbiy xizmatchilari Bojxona qo‘mitasining viloyat boshqarmasi xodimlari bilan birgalikda yana bir pirotexnika vositalari savdosi bilan shug‘ullanayotgan shaxs aniqlandi. Qarshi shahri “Zog‘za” MFY da yashovchi ushbu shaxsdan sertifikatlanmagan va umumiy qiymati 25 mln so‘m bo‘lgan pirotexnika vositasi olib qo‘yildi.
Hurmatli fuqarolar, eslatib o‘tamiz, O‘zbekiston Respublikasi Maʼmuriy javobgarlik kodeksining 185-1 moddasida pirotexnika buyumlarini qonunga xilof ravishda ishlab chiqarish, tayyorlash, saqlash, tashish, jo‘natish, ulardan foydalanish, ularni qonunga xilof ravishda O‘zbekiston Respublikasiga olib kirish, ushbu huquqbuzarlik ashyolarini musodara qilish bilan birgalikda bazaviy hisoblash miqdorining besh baravaridan yigirma baravarigacha miqdorda jarima solishga sabab bo‘lishi belgilangan.
Yodda tuting, sertifikatlanmagan pirotexnika vositalari sizning va bolalaringiz sog‘lig‘iga jiddiy xavf soladi.
