Avval xabar berganimizdek, Sankt-Peterburg shahrida bo‘lib o‘tayotgan Regbi-7 xalqaro turniri o‘z nihoyasiga yetdi va turnir davomida yetakchilik qilib kelgan O‘zbekiston Respublikasi Milliy gvardiyasi jamoasi ikkinchi o‘rinni egalladi.
Mazkur turnirda sportchilarimiz dastlab Jukov nomidagi Novosibirsk harbiy instituti jamoasini 17 : 10 hisobida, Rossgvardiyaning Perm harbiy instituti jamoasini 26 : 0 hisobida va Jukov nomidagi Saratov harbiy instituti jamoasini 26 : 0 hisobida mag‘lubiyatga uchratib final bosqichining munosib ishtirokchisiga aylanishdi.
Finalda esa sportchilarimiz bir necha yillar davomida Regbi bo‘yicha birinchilikda kelayotgan Jukov nomidagi Sankt-Peterburg jamoasi bilan to‘qnashib murosasiz kechgan bellashuvlar yakunida 17: 10 kichik hisob bilan ikkinchi o‘ringa sazovor bo‘lishdi.
Shunday qilib, mazkur musobaqada uchinchi o‘rin Saratov harbiy instituti jamoasiga va nufuzli birinchi o‘rin Sankt-Peterburg jamoasiga nasib qildi.
Xalqaro turnirning eng yaxshi o‘yinchisi nominatsiyasida esa O‘zbekiston Respublikasi Milliy gvardiyasi jamoasi aʼzosi bo‘lgan sportchimiz Dostonbek Usmonjonov nomzodi loyiq topilib, tashkilotchilar tomonidan munosib rag‘batlantirildi.
Milliy gvardiya qo‘mondonligi va barcha shaxsiy tarkibi nomidan sportchilarim va ularning murabbiylarini ushbu xalqaro turnirda erishgan yuqori natijalari bilan samimiy muborakbod etamiz!
