Аввал хабар берганимиздек, Санкт-Петербург шаҳрида бўлиб ўтаётган Регби-7 халқаро турнири ўз ниҳоясига етди ва турнир давомида етакчилик қилиб келган Ўзбекистон Республикаси Миллий гвардияси жамоаси иккинчи ўринни эгаллади.
Мазкур турнирда спортчиларимиз дастлаб Жуков номидаги Новосибирск ҳарбий институти жамоасини 17 : 10 ҳисобида, Россгвардиянинг Пермь ҳарбий институти жамоасини 26 : 0 ҳисобида ва Жуков номидаги Саратов ҳарбий институти жамоасини 26 : 0 ҳисобида мағлубиятга учратиб финал босқичининг муносиб иштирокчисига айланишди.
Финалда эса спортчиларимиз бир неча йиллар давомида Регби бўйича биринчиликда келаётган Жуков номидаги Санкт-Петербург жамоаси билан тўқнашиб муросасиз кечган беллашувлар якунида 17: 10 кичик ҳисоб билан иккинчи ўринга сазовор бўлишди.
Шундай қилиб, мазкур мусобақада учинчи ўрин Саратов ҳарбий институти жамоасига ва нуфузли биринчи ўрин Санкт-Петербург жамоасига насиб қилди.
Халқаро турнирнинг энг яхши ўйинчиси номинациясида эса Ўзбекистон Республикаси Миллий гвардияси жамоаси аъзоси бўлган спортчимиз Достонбек Усмонжонов номзоди лойиқ топилиб, ташкилотчилар томонидан муносиб рағбатлантирилди.
Миллий гвардия қўмондонлиги ва барча шахсий таркиби номидан спортчиларим ва уларнинг мураббийларини ушбу халқаро турнирда эришган юқори натижалари билан самимий муборакбод этамиз!
