Давлатимиз раҳбарининг топшириқларига биноан Миллий гвардия қўмондони генерал-майор Р.Джураев бошчилигидаги идоралараро ишчи гуруҳнинг, Хоразм вилоятида аҳоли муаммоларини аниқлаш ва ҳал этиш ҳамда криминоген вазият барқарорлигини таъминлаш юзасидан амалга оширилган ишлар натижалари сарҳисоб қилинди
Ишчи гуруҳ томонидан олиб борилган ўрганиш ишларининг якунлари бўйича жорий йилнинг 10 февраль куни Хоразм вилояти ҳокимиятида Миллий гвардия ва Ички ишлар вазирлигининг соҳавий хизматлари, Адлия вазирлиги, Солиқ қўмитаси, Бош прокуратура ва унинг тузилмалари раҳбарлари, вилоят сектор бошлиқлари ҳамда бошқа мутасадди идоралар вакиллари иштирокида йиғилиш бўлиб ўтди.
Йиғилишда вилоят аҳолисининг шу кунга қадар қийнаб келган муаммолар, жумладан ижтимоий инфратузилма объектларининг реал ҳолати, аҳолини газ, электр энергияси, кўмир ва ичимлик суви билан таъминлаш аҳволи, истеъмол бозорларидаги нарх-наво барқарорлиги, озиқ-овқат захиралари мавжудлиги ва тадбиркорлар учун қулай шароитлар яратилганлиги, ҳудуддаги ижтимоий-иқтисодий жиҳатдан оғир маҳаллаларда сектор раҳбарлари ва маҳалла фаоллари томонидан фуқароларни қабул қилиш ва уларнинг муаммоларини ҳал этиш амалиётига оид масалалар муҳокама этилди.
Хусусан, ишчи гуруҳ ташаббуси билан вилоят ҳудудида жами 9573 та хонадонга суюлтирилган газ балони ва 178 тонна кўмир етказиб берилиб, аҳолининг газ ва кўмир маҳсулотларига бўлган эҳтиёжи қисман қаноатлантирилди.
Истеъмол бозорларидаги нарх-наво барқарорлигини таъминлаш, озиқ-овқат захираларини яратиш ҳамда тадбиркорлар учун қулай шароитлар яратиш мақсадида, вилоятда 31 та арзонлаштирилган ярмарка, шундан 2 таси бозордан ташқарида, 18 таси эса олис ҳудудларда ташкил этилиб, уларда жами 198 тонна кундалик эҳтиёж истеъмол товарлари савдога қўйилди. Шунингдек, ўз маҳсулотини тўғридан-тўғри сотиш истагида бўлган 138 та томорқа ер эгаларига ўз маҳаллаларида қишлоқ хўжалиги маҳсулотларини сотиш учун савдо расталари ташкил этишга кўмаклашилди.
Ишсизлик ва камбағалликни қисқартириш, оилавий тадбиркорлик, ёшлар ва аёлларнинг ташаббускор лойиҳаларига кўмаклашиш мақсадида, вилоят ҳудудида жойлашган барча мономарказлар, меҳнат ярмаркалари, коворкинг марказлари фаолиятининг натижадорлиги ўрганилиб, натижаси бўйича 272 нафар фуқаролар доимий иш ўринларига жойлаштирилди, 287 нафари касбга ўқитишга юборилди, 106 нафарига субсидия ажратилди ҳамда 39 нафарига ишсизлик нафақаси тайинланди. Шунингдек, 493 нафар фуқаролар ўзини-ўзи банд қилиш, 65 нафари якка тартибдаги тадбиркорлик, 31 нафари кичик бизнес субъектлари ташкил қилиш орқали меҳнатга жалб этилди.
Вилоят ҳудудида ҳаракат хавфсизлигини таъминлаш, йўловчи ва ҳайдовчиларга қулайликлар яратиш мақсадида, Урганч туманида қўшимча равишда 2 та янги замонавий светофор ва 206 та йўл белгилари ўрнатилиб, 6 та светофор таъмирланди, 1500 м пиёдалар йўлаги ва 43 км йўл ётиқ чизиқлари янгиланди ҳамда ноқулай ҳудудларда йўлни ажратувчи 150 метрдан зиёд тўсиқлар ўрнатиш каби бошқа бир қатор ишлар амалга оширилди.
Шу билан бирга, маҳалларда аҳолининг мурожаатлари билан ишлаш аҳволи ва уларни қаноатлантириш даражаси танқидий ўрганилиб, бугунги кунда жами 66 та маҳалла фуқаролар йиғинларида 1109 та сайёр давлат хизматлари кўрсатилиши ташкил этилди.
