Davlatimiz rahbarining topshiriqlariga binoan Milliy gvardiya qo‘mondoni general-mayor R.Djurayev boshchiligidagi idoralararo ishchi guruhning, Xorazm viloyatida aholi muammolarini aniqlash va hal etish hamda kriminogen vaziyat barqarorligini taʼminlash yuzasidan amalga oshirilgan ishlar natijalari sarhisob qilindi
Ishchi guruh tomonidan olib borilgan o‘rganish ishlarining yakunlari bo‘yicha joriy yilning 10 fevral kuni Xorazm viloyati hokimiyatida Milliy gvardiya va Ichki ishlar vazirligining sohaviy xizmatlari, Adliya vazirligi, Soliq qo‘mitasi, Bosh prokuratura va uning tuzilmalari rahbarlari, viloyat sektor boshliqlari hamda boshqa mutasaddi idoralar vakillari ishtirokida yig‘ilish bo‘lib o‘tdi.
Yig‘ilishda viloyat aholisining shu kunga qadar qiynab kelgan muammolar, jumladan ijtimoiy infratuzilma obyektlarining real holati, aholini gaz, elektr energiyasi, ko‘mir va ichimlik suvi bilan taʼminlash ahvoli, isteʼmol bozorlaridagi narx-navo barqarorligi, oziq-ovqat zaxiralari mavjudligi va tadbirkorlar uchun qulay sharoitlar yaratilganligi, hududdagi ijtimoiy-iqtisodiy jihatdan og‘ir mahallalarda sektor rahbarlari va mahalla faollari tomonidan fuqarolarni qabul qilish va ularning muammolarini hal etish amaliyotiga oid masalalar muhokama etildi.
Xususan, ishchi guruh tashabbusi bilan viloyat hududida jami 9573 ta xonadonga suyultirilgan gaz baloni va 178 tonna ko‘mir yetkazib berilib, aholining gaz va ko‘mir mahsulotlariga bo‘lgan ehtiyoji qisman qanoatlantirildi.
Isteʼmol bozorlaridagi narx-navo barqarorligini taʼminlash, oziq-ovqat zaxiralarini yaratish hamda tadbirkorlar uchun qulay sharoitlar yaratish maqsadida, viloyatda 31 ta arzonlashtirilgan yarmarka, shundan 2 tasi bozordan tashqarida, 18 tasi esa olis hududlarda tashkil etilib, ularda jami 198 tonna kundalik ehtiyoj isteʼmol tovarlari savdoga qo‘yildi. Shuningdek, o‘z mahsulotini to‘g‘ridan-to‘g‘ri sotish istagida bo‘lgan 138 ta tomorqa yer egalariga o‘z mahallalarida qishloq xo‘jaligi mahsulotlarini sotish uchun savdo rastalari tashkil etishga ko‘maklashildi.
Ishsizlik va kambag‘allikni qisqartirish, oilaviy tadbirkorlik, yoshlar va ayollarning tashabbuskor loyihalariga ko‘maklashish maqsadida, viloyat hududida joylashgan barcha monomarkazlar, mehnat yarmarkalari, kovorking markazlari faoliyatining natijadorligi o‘rganilib, natijasi bo‘yicha 272 nafar fuqarolar doimiy ish o‘rinlariga joylashtirildi, 287 nafari kasbga o‘qitishga yuborildi, 106 nafariga subsidiya ajratildi hamda 39 nafariga ishsizlik nafaqasi tayinlandi. Shuningdek, 493 nafar fuqarolar o‘zini-o‘zi band qilish, 65 nafari yakka tartibdagi tadbirkorlik, 31 nafari kichik biznes subyektlari tashkil qilish orqali mehnatga jalb etildi.
Viloyat hududida harakat xavfsizligini taʼminlash, yo‘lovchi va haydovchilarga qulayliklar yaratish maqsadida, Urganch tumanida qo‘shimcha ravishda 2 ta yangi zamonaviy svetofor va 206 ta yo‘l belgilari o‘rnatilib, 6 ta svetofor taʼmirlandi, 1500 m piyodalar yo‘lagi va 43 km yo‘l yotiq chiziqlari yangilandi hamda noqulay hududlarda yo‘lni ajratuvchi 150 metrdan ziyod to‘siqlar o‘rnatish kabi boshqa bir qator ishlar amalga oshirildi.
Shu bilan birga, mahallarda aholining murojaatlari bilan ishlash ahvoli va ularni qanoatlantirish darajasi tanqidiy o‘rganilib, bugungi kunda jami 66 ta mahalla fuqarolar yig‘inlarida 1109 ta sayyor davlat xizmatlari ko‘rsatilishi tashkil etildi.
