Davlatimiz rahbarining "Oʻzbekiston Respublikasida OIV infeksiyasining tarqalishiga qarshi kurashish samaradorligini oshirish boʻyicha qoʻshimcha chora-tadbirlar toʻgʻrisida" qarori ijrosini taʼminlash maqsadida Milliy gvardiya Ma’naviyat va ma’rifat markazida "1-dekabr - Butun jahon OITSga qarshi kurash kuni" munosabati bilan keng qamrovli profilaktik tadbir tashkil etildi.
Mazkur tadbirda Respublika OITSga qarshi kurashish markazi Profilaktika va epidemiologiyaga qarshi ishlar boʻlim mudiri N. Umarova, Milliy gvardiya markaziy devoni Tibbiyot boshqarmasi boshligʻi O.Rajabov, gvardiyachilar va ularning oila aʼzolari, Jamoat xavfsizligi universiteti kursantlari, "Temurbeklar maktabi" hamda Respublika harbiy musiqa akademik litseyi oʻquvchilari ishtirok etishdi.
Dastlab so‘zga chiqqan mutaxassislar, "Harbiy intizom va sogʻlom turmush tarzi - OITSdan himoyaning asosi" hamda "OITS epidemiologiyasi, tashxisi va profilaktikasi" mavzusidagi maʼruzalarida dunyoda inson salomatligiga salbiy taʼsir koʻrsatadigan turli xil kasallik borligi, ammo shunday kasalliklar borki, uning nomi kasallik keltiradigan zarardan ogʻirroq, azobliroqligi, bu dardga chalingan insonlar qaysidir maʼnoda jamiyatdan uzilib qolganday his qilishi va bu kasallik OIV va OITS kasalliklari boʻlib, butun jahonda millionlab insonlarning umriga zomin boʻlayotganligi haqida to‘xtalib o‘tishdi.
Shuningdek, gvardiyachilar va ularning oila aʼzolarining sog‘lom turmush tarzini shakllantirishlari, shaxsiy gigiyena qoidalariga rioya qilishlari va mas’uliyatli xulq-atvorning ahamiyati alohida ta’kidlandi. Shuningdek, OITSga qarshi kurashda har bir fuqaroning hushyorligi va ongli yondashuvi muhim ekani global miqyosda davom etayotgan bu muammo bizning mamlakatimizni ham chetlab oʻtayotgani, shu bois, yurtimizda maʼnaviy qadriyatlarimizga zid, kelajak avlodlar salomatligiga jiddiy raxna soladigan bunday illatlarga qarshi kurashish va inson salomatligini asrashga alohida eʼtibor qaratilayotganligi qayd etildi.
Tadbir davomida mutaxassislar tomonidan tayyorlab kelingan vizual materiallar namoyish etilib, kasallik haqida keng jamoatchilik orasida uchraydigan noto‘g‘ri qarashlar tahlil qilinib, ularga ilmiy asoslangan izohlar berildi.
Ushbu ma’rifiy uchrashuv Milliy gvardiya tizimida sog‘lom muhitni shakllantirish, xodimlarning bilim va xabardorligini yanada oshirishga xizmat qildi.
