Давлатимиз раҳбарининг "Ўзбекистон Республикасида ОИВ инфекциясининг тарқалишига қарши курашиш самарадорлигини ошириш бўйича қўшимча чора-тадбирлар тўғрисида" қарори ижросини таъминлаш мақсадида Миллий гвардия Маънавият ва маърифат марказида "1 декабрь - Бутун жаҳон ОИТСга қарши кураш куни" муносабати билан кенг қамровли профилактик тадбир ташкил этилди.
Мазкур тадбирда Республика ОИТСга қарши курашиш маркази Профилактика ва эпидемиологияга қарши ишлар бўлим мудири Н. Умарова, Миллий гвардия марказий девони Тиббиёт бошқармаси бошлиғи О.Ражабов, гвардиячилар ва уларнинг оила аъзолари, Жамоат хавфсизлиги университети курсантлари, "Темурбеклар мактаби" ҳамда Республика ҳарбий мусиқа академик лицейи ўқувчилари иштирок этишди.
Дастлаб сўзга чиққан мутахассислар, "Ҳарбий интизом ва соғлом турмуш тарзи - ОИТСдан ҳимоянинг асоси" ҳамда "ОИВ эпидемиологияси, ташхиси ва профилактикаси" мавзусидаги маърузаларида дунёда инсон саломатлигига салбий таъсир кўрсатадиган турли хил касаллик борлиги, аммо шундай касалликлар борки, унинг номи касаллик келтирадиган зарардан оғирроқ, азоблироқлиги, бу дардга чалинган инсонлар қайсидир маънода жамиятдан узилиб қолгандай ҳис қилиши ва бу касаллик ОИВ ва ОИТС касалликлари бўлиб, бутун жаҳонда миллионлаб инсонларнинг умрига зомин бўлаётганлиги ҳақида тўхталиб ўтишди.
Шунингдек, гвардиячилар ва уларнинг оила аъзоларининг соғлом турмуш тарзини шакллантиришлари, шахсий гигиена қоидаларига риоя қилишлари ва масъулиятли хулқ-атворнинг аҳамияти алоҳида таъкидланди. Шунингдек, ОИТСга қарши курашда ҳар бир фуқаронинг ҳушёрлиги ва онгли ёндашуви муҳим экани глобал миқёсда давом этаётган бу муаммо бизнинг мамлакатимизни ҳам четлаб ўтаётгани, шу боис, юртимизда маънавий қадриятларимизга зид, келажак авлодлар саломатлигига жиддий рахна соладиган бундай иллатларга қарши курашиш ва инсон саломатлигини асрашга алоҳида эътибор қаратилаётганлиги қайд этилди.
Тадбир давомида мутахассислар томонидан тайёрлаб келинган визуал материаллар намойиш этилиб, касаллик ҳақида кенг жамоатчилик орасида учрайдиган нотўғри қарашлар таҳлил қилиниб, уларга илмий асосланган изоҳлар берилди.
Ушбу маърифий учрашув Миллий гвардия тизимида соғлом муҳитни шакллантириш, ходимларнинг билим ва хабардорлигини янада оширишга хизмат қилди.
