Davlatimiz rahbarining 2021 yil 5 avgustdagi “Chavandozlar maktablari faoliyatini tashkil etish chora-tadbirlari toʻgʻrisidagi” Qarorlari asosida, hozirda Toshkent shahri, Buxoro, Andijon, Namangan va Fargʻona viloyatlarida Milliy gvardiya Chavandozlar maktablari, Surxondaryo viloyatida Qorabayir otlari mahorat maktabi zamon talablari asosida bunyod etilib, faoliyat yuritib kelmoqda.
Toshkent shahrida faoliyat yuritib kelayotgan Milliy gvardiya Chavandozlar maktabi hamda uning hududida boʻlgan kamondan otish sport bazasi kompleksida ham Davlatimiz rahbari tomonidan, olimpiya va paralimpiya harakati, ixtisoslashtirilgan va ommaviy sportni yangi bosqichga olib chiqish hamda aholi jismoniy faolligini oshirish borasida belgilab berilgan vazifalarning amaliy ijrosini yaqqol koʻrishimiz mumkin.
Xususan, kuni kecha mazkur majmuaning faoliyati bilan yaqindan tanishish uchun, Milliy gvardiya qoʻmondoni general-mayor R.Djurayev, Prezident Administratsiyasi masʼul xodimi A.Murtazoyev, Sport vazirining oʻrinbosari SH.Mahmudov, Toshkent shahar hokimi oʻrinbosari D.Rahimova, Respublika bolalar ijtimoiy moslashuvi markazi direktori V.Alimova, Oʻzbekiston Yilqichilik va ot sporti federatsiyasi raisi B.Gaziyev, Oʻzbekiston Polo federatsiyasi raisi A.Rustambayev, Uloq koʻpkari federatsiyasi raisi R.Adxamov, Jaxon Koʻpkari Assotsiatsiyasi birinchi vitse-prezidenti E.Abzalov hamda sohaga oid mutasaddi rahbarlar tashrif buyurishdi. Unda “Olmos” mahallasi raisi Mamurjon Kenjayev boshchiligidagi mahalla faollari va yoshlari, shuningdek ushbu sport majmuasida doimiy shugʻullanib keluvchi sportchi va murabbiylar hamda poytaxtimizdagi Mehribonlik uyi tarbiyalanuvchilari ishtirok etishdi.
Ushbu Chavandozlar maktabi, ot sporti turlarini yanada rivojlantirish, yangi avlod chavandozlarini tayyorlash va tarbiyalash, yoshlar oʻrtasida faol targʻib qilish va ommalashtirishga xizmat qilish bilan birga, bolalarni ippoterapiya uslubi yordamida davolaydigan, shuningdek kamon va parakamondan otish sporti turi boʻyicha 70 metrli zamonaviy sport maydonchasi va yopiq binosiga ega boʻlgan va merganlarning yozda ham qishda ham shugʻullanishlari, xalqaro musobaqalarni oʻtkazilishi hamda olimpiya(paralimpiya)musobaqalariga tayyorgarlik koʻrish uchun barcha imkoniyatlarga ega ekanligi mehmonlarda katta taassurot qoldirdi.
Shu bilan birga, ushbu hududda mahalla aholisi va yoshlarning koʻngilli dam olishini tashkil qilish uchun zarur infratuzilma obyektlari, xususan yoshlarni sport bilan shugʻullanishlari uchun vorkaut va bolalar oʻyin maydonchalari, aholi uchun sayir qilish yoʻlaklari hamda qahvaxona mavjud boʻlib, mazkur sport kompleks hududi hatto xorijiy sayyohlar tashrif buyuradigan maskanga aylanishi eʼtirof etildi.
Tadbir davomida sportchilar, mahalla faollari va yoshlari hamda mehribonlik uyi tarbiyalanuvchilari bilan Milliy gvardiya qoʻmondoni uchrashib, ochiq muloqot davomida ushbu majmua toʻgʻrisidagi fikr-mulohazalari tinglandi, yaratilgan shart-sharoitlardan ularning unumli foydalanishlari uchun yanada keng imkoniyatlar yaratib berilishi yuzasidan esa masʼul rahbarlarga topshiriqlar berildi. Oʻz navbatida bir guruh sportchi va murabbiylar munosib ragʻbatlantirildi.