“IBRATLI OILA” KO‘RIK TANLOVI VODIY VILOYATLARI O‘RTASIDA
Oila - jamiyatning negizidir, shunday ekan oila ruhan sog‘lom hamda farovon bo‘lsa, jamiyat ham yuksalaveradi.
O‘zbekiston Respublikasi Milliy gvardiyasi harbiy xizmatchilari oila aʼzolarining ijodiy salohiyatini rivojlantirish va harbiylarning oilalaridagi ijobiy hayotiy tajribani ommalashtirish maqsadida Milliy gvardiya Andijon, Namangan va Farg‘ona viloyatlari bo‘yicha boshqarmalari harbiy xizmatchilari va ularning oila aʼzolari o‘rtasida “Mustahkam oila jamiyat tayanchi” g‘oyasi asosida “Ibratli oila” ko‘rik tanlovining hududiy bosqichi bo‘lib o‘tdi.
Mazkur tanlovga tashrif buyurgan Milliy gvardiya Andijon viloyati bo‘yicha boshqarmasidan serjant Ablaqulovlar oilasi, Farg‘ona viloyatidan serjant Yuldashev oilasi, Namangan viloyatidan serjant Soatovlar oilasi o‘zaro bellashdilar.
Tanishtirish, sahna ko‘rinishi hamda milliy anʼana va urf-odatlarni ko‘rgazmali namoyish etish mavzularidan iborat bo‘lgan 3 ta shart asosida bellashgan ishtirokchilar adolat mezonlari asosida baholanib borildi.
Tanlov yakuniga ko‘ra Milliy gvardiya Andijon viloyati bo‘yicha boshqarmasi 3-o‘rin, Milliy gvardiya Farg‘ona viloyati bo‘yicha boshqarmasi 2-o‘rin va Milliy gvardiya Namangan viloyati bo‘yicha boshqarmasi ishtirokchisi faxrli 1-o‘rinni qo‘lga kiritib, “Ibratli oila” ko‘rik tanlovining respublika bosqichiga yo‘llanmani qo‘lga kiritdi.
Tanlov g‘oliblari Farg‘ona viloyati bo‘yicha Milliy gvardiya boshqarmasining diplom va qimmatbaho esdalik sovg‘alari bilan taqdirlandi.
Ko‘rik tanlov Farg‘ona “O‘zbek konsert” uyushmasining taniqli sanʼatkorlari tomonidan ijro etilgan sho‘x ko‘y-qo‘shiqlari asosida bayramona kayfiyatda o‘tkazildi.
