“ИБРАТЛИ ОИЛА” КЎРИК-ТАНЛОВИ ВОДИЙ ВИЛОЯТЛАРИ ЎРТАСИДА
Оила - жамиятнинг негизидир, шундай экан оила руҳан соғлом ҳамда фаровон бўлса, жамият ҳам юксалаверади.
Ўзбекистон Республикаси Миллий гвардияси ҳарбий хизматчилари оила аъзоларининг ижодий салоҳиятини ривожлантириш ва ҳарбийларнинг оилаларидаги ижобий ҳаётий тажрибани оммалаштириш мақсадида Миллий гвардия Андижон, Наманган ва Фарғона вилоятлари бўйича бошқармалари ҳарбий хизматчилари ва уларнинг оила аъзолари ўртасида “Мустаҳкам оила жамият таянчи” ғояси асосида “Ибратли оила” кўрик танловининг ҳудудий босқичи бўлиб ўтди.
Мазкур танловга ташриф буюрган Миллий гвардия Андижон вилояти бўйича бошқармасидан сержант Аблақуловлар оиласи, Фарғона вилоятидан сержант Юлдашев оиласи, Наманган вилоятидан сержант Соатовлар оиласи ўзаро беллашдилар.
Таништириш, саҳна кўриниши ҳамда миллий анъана ва урф-одатларни кўргазмали намойиш этиш мавзуларидан иборат бўлган 3 та шарт асосида беллашган иштирокчилар адолат мезонлари асосида баҳоланиб борилди.
Танлов якунига кўра Миллий гвардия Андижон вилояти бўйича бошқармаси 3-ўрин, Миллий гвардия Фарғона вилояти бўйича бошқармаси 2-ўрин ва Миллий гвардия Наманган вилояти бўйича бошқармаси иштирокчиси фахрли 1-ўринни қўлга киритиб, “Ибратли оила” кўрик танловининг республика босқичига йўлланмани қўлга киритди.
Танлов ғолиблари Фарғона вилояти бўйича Миллий гвардия бошқармасининг диплом ва қимматбаҳо эсдалик совғалари билан тақдирланди.
Кўрик танлов Фарғона “Ўзбек концерт” уюшмасининг таниқли санъаткорлари томонидан ижро этилган шўх кўй-қўшиқлари асосида байрамона кайфиятда ўтказилди.
