O‘zbekiston Respublikasi Milliy gvardiyasi qo‘mondonligi tashabbusi bilan Sirdaryo viloyatida joylashgan Respublika o‘g‘il bolalar o‘quv-tarbiya muassasasi tarbiyalanuvchilarining yozgi taʼtil vaqtlarini mazmunli tashkil etish maqsadida beshta muhim tashabbus doirasida maʼnaviy-maʼrifiy va sport musobaqalari tashkil etildi.

Tadbirlar davomida yoshlar o‘quv-tarbiya muassasasida faoliyati yo‘lga qo‘yilgan kitobxonlik, rassomchilik, duradgorlik, sportning yunon-rum kurashi, futbol to‘garaklarida egallagan ko‘nikmalarini namoyish etishdi.

Alohida taʼkidlash joizki, Milliy gvardiya sport kurashlariga ixtisoslashtirilgan olimpiya zaxiralari maktabi tomonidan kurashning yunon-rim turidan Osiyo va Jahon chempionati sovrindori murabbiyligida yo‘lga qo‘yilgan to‘garaklarda nafaqat o‘quv tarbiya muassasasining tarbiyalanuvchilari balki hududdagi ushbu sportga qiziqishi bo‘lgan 15 dan ziyod yoshlar ham bepul shug‘ullanib kelishmoqda.

Shuningdek, masʼul ofitserlar va bugunda yoshlarga o‘z intilishlari bilan motivatsiya berayotgan O‘zbekiston davlat sanʼat va madaniyat instituti talabasi, motivator, 1-guruh nogironi Murodbek Jigitovlar ishtirokida uchrashuv ham uyushtirildi. Qizg‘in savol-javoblarga boy o‘tgan uchrashuv o‘quvchilarda iliq taassurot qoldirdi.

Tadbir so‘ngida Milliy gvardiya Sirdaryo viloyati bo‘yicha boshqarmasi harbiy xizmatchilari tomonidan qurol-yarog‘lar ko‘rgazmasi hamda viloyat madaniyat boshqarmasi vakillari tomonidan yoshlar uchun konsert dasturi namoyish etildi.