ЎҚУВЧИЛАРНИНГ ТАЪТИЛДАГИ БЎШ ВАҚТИ МАРОҚЛИ ЎТМОҚДА
Ўзбекистон Республикаси Миллий гвардияси қўмондонлиги ташаббуси билан Сирдарё вилоятида жойлашган Республика ўғил болалар ўқув-тарбия муассасаси тарбияланувчиларининг ёзги таътил вақтларини мазмунли ташкил этиш мақсадида бешта муҳим ташаббус доирасида маънавий-маърифий ва спорт мусобақалари ташкил этилди.
Тадбирлар давомида ёшлар ўқув-тарбия муассасасида фаолияти йўлга қўйилган китобхонлик, рассомчилик, дурадгорлик, спортнинг юнон-рум кураши, футбол тўгаракларида эгаллаган кўникмаларини намойиш этишди.
Алоҳида таъкидлаш жоизки, Миллий гвардия спорт курашларига ихтисослаштирилган олимпия захиралари мактаби томонидан курашнинг юнон-рим туридан Осиё ва Жаҳон чемпионати совриндори мураббийлигида йўлга қўйилган тўгаракларда нафақат ўқув тарбия муассасасининг тарбияланувчилари балки ҳудуддаги ушбу спортга қизиқиши бўлган 15 дан зиёд ёшлар ҳам бепул шуғулланиб келишмоқда.
Шунингдек, масъул офицерлар ва бугунда ёшларга ўз интилишлари билан мотивация бераётган Ўзбекистон давлат санъат ва маданият институти талабаси, мотиватор, 1-гуруҳ ногирони Муродбек Жигитовлар иштирокида учрашув ҳам уюштирилди. Қизғин савол-жавобларга бой ўтган учрашув ўқувчиларда илиқ таассурот қолдирди.
Тадбир сўнгида Миллий гвардия Сирдарё вилояти бўйича бошқармаси ҳарбий хизматчилари томонидан қурол-яроғлар кўргазмаси ҳамда вилоят маданият бошқармаси вакиллари томонидан ёшлар учун концерт дастури намойиш этилди.
