Mahallalarda xavfsiz muhitni yaratishga qaratilgan chora-tadbirlar olib borilmoqda
Milliy gvardiya Jamoat xavfsizligi universiteti rahbariyati boshchiligidagi professor-o‘qituvchilardan iborat ishchi guruh tomonidan Fargʻona viloyatining Uchko‘prik tumanidagi uch yildan buyon “qizil” toifada bo‘lib kelayotgan “Uchko‘prik” mahallasida “Mahallada xavfsiz muhitni yaratish va huquqbuzarliklarning barvaqt oldini olish samaradorligini ta’minlashning dolzarb masalalari” mavzusida jinoyatchilikni jilovlash, huquqbuzarliklarning oldini olish hamda ijtimoiy profilaktika tadbirlari o‘tkazildi.
Mazkur tadbirda Milliy gvardiya, tuman hokimligi, prokuratura, ichki ishlar bo‘limi xodimlari, mahalla yettiligi hamda mahalla faollari ishtirok etdi. Unda mahallada jinoyatchilikning oldini olish borasida 1-chorak davomida amalga oshirilgan ishlar, jinoyatchilik tahlili, hududdagi ijtimoiy-iqtisodiy muammolar hamda ijtimoiy-profilaktika tizimidagi kamchiliklar ko‘rib chiqildi. Shuningdek, 2026-yil 2-chorakda amalga oshirilishi lozim bo‘lgan ustuvor vazifalar belgilab olinib, tegishli topshiriqlar berildi.
O‘rganishlar davomida hududga biriktirilgan mas’ullarga O‘zbekiston Respublikasi Prezidentining 2026-yil 27-yanvardagi “Toshkent shahrida xavfsiz muhitni shakllantirish hamda jamoat xavfsizligini samarali ta’minlash bo‘yicha namunaviy amaliyotni yaratish chora-tadbirlari yuzasidan videoselektor yig‘ilishi”da belgilangan vazifalar ijrosi yuzasidan tushuntirishlar berildi. Shuningdek, 2026-yil 5-yanvarda qabul qilingan “Respublika mahallalarida xavfsiz muhitni yaratish yo‘nalishida yaxlit, manzilli ishlash tizimini joriy etishga qaratilgan qo‘shimcha chora-tadbirlar to‘g‘risida”gi PQ-1-son hamda “2026-yilda respublika mahallalarida jinoyatchilikni barvaqt profilaktika qilish samaradorligini yanada oshirish bo‘yicha tashkiliy chora-tadbirlar to‘g‘risida”gi PQ-2-son qarorlarining mazmun-mohiyati tushuntirildi.
Mahalladagi mavjud muammolar atroflicha o‘rganilib, ularni bartaraf etish yuzasidan ilmiy yondashuvlar asosida manzilli taklif va tavsiyalar berildi. Bundan tashqari, Jamoat xavfsizligi universiteti professor-o‘qituvchilari tomonidan tayyorlangan “Yashirin iqtisodiyotga qarshi kurashish”, “Kiberjinoyatchilikka qarshi kurashish”, “Narkojinoyatchilikka qarshi kurashish” mavzularidagi buklet va flayerlar, ijtimoiy so‘rovnomalar hamda videoroliklar mahalla aholisi o‘rtasida keng targ‘ib qilindi.
