Maktab o‘quvchisi, esda tuting: pichoq himoyani kafolatlamaydi va obro‘ ham bermaydi, ammo u sizning yoki o‘zga fuqaroning hayotini xavf ostiga qo‘yadi.
11-mart kuni Farg‘ona viloyati va Toshkent shahrida taʼlim muassasalarini qo‘riqlashning yangi tizimi doirasida o‘quvchi va o‘qituvchilar xavfsizligini taʼminlash maqsadida maktablarda xizmat olib borayotgan Milliy gvardiya xodimlari tomonidan pichoq olib yurish bilan bog‘liq ikkita holat aniqlangan.
Shu tariqa, Qo‘qon shahrida soat 13:50 larda 35-sonli maktabga kirishga uringan bir yigitni yangi tizim asosida xizmat qilayotgan maktab qorovuli to‘xtatib qolgan. Shu maktabda o‘qiysizmi, degan savolga u o‘qimayman, deb javob bergan va nima uchun maktabga kelganini tushuntira olmagan. Milliy gvardiya qo‘riqlash xizmatiga qarashli tezkor harakatlanuvchi guruh chaqirilib, yigitni ichki ishlar organlari profilaktika inspektoriga topshirishgan. U 2007-yilda tug‘ilgan kollej o‘quvchisi I. X. ekanligi aniqlangan. Profilaktika inspektori yigitning ota-onasiga qo‘ng‘iroq qilgan, uning huzurida shaxsiy tintuv vaqtida oshxona pichog‘i topilgan.
Shu kuni kechki soat taxminan 18.20 larda Toshkent shahrining Mirzo Ulug‘bek tumanidagi 275-sonli maktabda o‘qituvchi va o‘quvchilar xavfsizligini taʼminlash, huquq-tartibotni saqlash maqsadida xizmat olib borayotgan Milliy gvardiya qo‘riqlash xizmati xodimlariga 4-sinf rahbari jismoniy tarbiya darsi oldidan kiyim almashtirish xonasida 10-sinf o‘quvchilari U.I. va T.A. lar sinfdoshlariga sport sumkasida olib yurgan pichoqni ko‘rsatgan.
O‘quvchilar U.I. va T.A. larning ota-onalari maktabga taklif etilib, ular bilan Mirzo Ulug‘bek tumani IIB profilaktika inspektori va maktab direktori profilaktik suhbat o‘tkazishgan. O‘smirlardan pichoq olib qo‘yilib, ularning ota-onalariga nisbatan O‘zbekiston Respublikasi Maʼmuriy javobgarlik to‘g‘risidagi kodeksining 47-moddasi (“Bolalarni tarbiyalash va o‘qitish bo‘yicha majburiyatlarni bajarmaslik”) bilan bayonnoma rasmiylashtirilgan.
Hurmatli ota-onalar, farzandlaringizga eʼtiborli bo‘ling, bolangizning sevimli mashg‘ulotlariga qiziqing, u bilan ko‘proq gaplashing, cho‘ntagi yoki sumkasidagi pichoq himoyani kafolatlamasligini va obro‘ ham bermasligini, balki uning hayotini yoki o‘zga fuqaroning hayotiga xavf ostiga qo‘yishini tushuntiring. Bolalar bilan ishonchli munosabatlarni o‘rnating. Axir, bu sizning farzandingiz. Zero, har bir insonning orzusi zurriyotini yaxshi inson qilib tarbiyalash va unga baxtli kelajak yaratib berishdir.
