Мактаб ўқувчиси, эсда тутинг: пичоқ ҳимояни кафолатламайди ва обрў ҳам бермайди, аммо у сизнинг ёки ўзга фуқаронинг ҳаётини хавф остига қўяди.
11-март куни Фарғона вилояти ва Тошкент шаҳрида таълим муассасаларини қўриқлашнинг янги тизими доирасида ўқувчи ва ўқитувчилар хавфсизлигини таъминлаш мақсадида мактабларда хизмат олиб бораётган Миллий гвардия ходимлари томонидан пичоқ олиб юриш билан боғлиқ иккита ҳолат аниқланган.
Шу тариқа, Қўқон шаҳрида соат 13:50 ларда 35-сонли мактабга киришга уринган бир йигитни янги тизим асосида хизмат қилаётган мактаб қоровули тўхтатиб қолган. Шу мактабда ўқийсизми, деган саволга у ўқимайман, деб жавоб берган ва нима учун мактабга келганини тушунтира олмаган. Миллий гвардия қўриқлаш хизматига қарашли тезкор ҳаракатланувчи гуруҳ чақирилиб, йигитни ички ишлар органлари профилактика инспекторига топширишган. У 2007-йилда туғилган коллеж ўқувчиси И. Х. эканлиги аниқланган. Профилактика инспектори йигитнинг ота-онасига қўнғироқ қилган, унинг ҳузурида шахсий тинтув вақтида ошхона пичоғи топилган.
Шу куни кечки соат тахминан 18.20 ларда Тошкент шаҳрининг Мирзо Улуғбек туманидаги 275-сонли мактабда ўқитувчи ва ўқувчилар хавфсизлигини таъминлаш, ҳуқуқ-тартиботни сақлаш мақсадида хизмат олиб бораётган Миллий гвардия қўриқлаш хизмати ходимларига 4-синф раҳбари жисмоний тарбия дарси олдидан кийим алмаштириш хонасида 10-синф ўқувчилари У.И. ва Т.А. лар синфдошларига спорт сумкасида олиб юрган пичоқни кўрсатган.
Ўқувчилар У.И. ва Т.А. ларнинг ота-оналари мактабга таклиф этилиб, улар билан Мирзо Улуғбек тумани ИИБ профилактика инспектори ва мактаб директори профилактик суҳбат ўтказишган. Ўсмирлардан пичоқ олиб қўйилиб, уларнинг ота-оналарига нисбатан Ўзбекистон Республикаси Маъмурий жавобгарлик тўғрисидаги кодексининг 47-моддаси (“Болаларни тарбиялаш ва ўқитиш бўйича мажбуриятларни бажармаслик”) билан баённома расмийлаштирилган.
Ҳурматли ота-оналар, фарзандларингизга эътиборли бўлинг, болангизнинг севимли машғулотларига қизиқинг, у билан кўпроқ гаплашинг, чўнтаги ёки сумкасидаги пичоқ ҳимояни кафолатламаслигини ва обрў ҳам бермаслигини, балки унинг ҳаётини ёки ўзга фуқароларнинг ҳаётига хавф остига қўйишини тушунтиринг. Болалар билан ишончли муносабатларни ўрнатинг. Ахир, бу сизнинг фарзандингиз. Зеро, ҳар бир инсоннинг орзуси зурриётини яхши инсон қилиб тарбиялаш ва унга бахтли келажак яратиб беришдир.
