Mahallalarda yoshlar bilan ishlash tizimini tubdan takomillashtirish chora-tadbirlari bugun amalda ijro etilmoqda. Farg‘ona viloyati Qo‘qon shahrida faoliyat olib borayotgan Respublika ishchi guruhi yoshlar yetakchilariga o‘g‘il-qizlarning kasb- hunar, sport, fan to‘garaklariga qiziqishlari hamda orzu istaklarini ro‘yobga chiqarish borasida ishlarni to‘g‘ri yo‘lga qo‘yishlarida ko‘mak berib, bu borada ular bilan hamkorlikda tadbirlar tashkillashtirilmoqda. Milliy gvardiyaning Qo‘qon shahrida joylashgan harbiy qismida o‘tkazilgan "Milliy gvardiya yoshlar nigohida" mavzusidagi ochiq eshiklar kuni ham kun mavzusiga oid tadbirning navbatdagisi bo‘ldi.

Tadbirga Buloqboshi, At-Termiziy va O‘rmonbog‘ MFY bitiruvchi sinf o‘quvchilari hamda uyushmagan yoshlar taklif etildi. Masʼul vakillar tomonidan ularning fan va to‘garaklar, kasb-hunarga bo‘lgan qiziqishlari suhbat jarayonida o‘rganildi. Shuningdek, faol ishtirok etgan yoshlar harbiy qismdagi tulporlar bilan tanishib, ot minish imkoniga ega bo‘ldi.

Shuningdek, yoshlar Kinologiya xizmati xizmat itlarining jinoyatlarni qanday fosh etishlari va ularni jilovlash borasidagi harakatlarning guvohi bo‘ldi. Bundan tashqari tosh ko‘tarish,qo‘l jangi, boks, sportning kamondan otish turi bo‘yicha xam mahorat darslarida qatnashdi.

Harbiy xizmatchilarning tog‘ balandligi tayyorgarligi mashg‘ulotlari, tez tibbiy yordam ko‘rsatish kabi o‘quv nuqtalari o‘quvchilarda iliq taassurot qoldirdi.

Tadbir yakunida Respublika ishchi guruhi aʼzolari tomonidan yosh avlodga tashakkurnoma va sovg‘alar taqdim etilib,maʼdaniy-maʼrifiy kecha kuy- qo‘shiqlar bilan davom etdi.