Тошкент шаҳридаги “Ғалаба боғи” ёдгорлик мажмуасида Иккинчи жаҳон уруши қатнашчилари ва фронт ортида хизмат қилган юртдошларимиз хотирасига бағишлаб илк бор “Шон-шараф” республика ҳарбий фестивали бўлиб ўтди. Мингдан ортиқ ёшлар иштирок этган мазкур фестиваль Ўзбекистон Республикаси ёшлар ишлари агентлиги, Мудофаа, Миллий гвардия, Ички ишлар, Фавқулодда вазиятлар, Давлат хавфсизлик хизмати, Давлат божхона қўмитаси ҳамда Олий ва ўрта махсус таълим, Халқ таълими вазирликлари билан ҳамкорликда ташкиллаштирилди.
Фестивалда дастлаб ёшлар қаҳрамон ўзбек аёли Зулфия Зокирова ва унинг садоқатли келинлари шарафига ўрнатилган “Матонат мадҳияси” мажмуаси пойига Ўзбекистон Республикаси Миллий гвардияси Фахрий қоровул бўлинмаси ҳарбий хизматчилари ҳамроҳлигида гулчамбарлар қўйиб, ҳурмат бажо келтиришди.
Тадбир давомида олий ҳарбий таълим муассасалари курсантлари ҳамда Тошкент “Темурбеклар мактаби” ўқувчиларининг саф юришлари намойиш этилди. Фестивалнинг иккинчи қисми “Шон-шараф” музейида давом эттирилди. Унда фахрийлар ёшларга ҳарбий хизматдаги ютуқлари ва ҳаёт йўллари ҳақида сўзлаб беришди. Учрашув сўнгида ёшлар музей бўйлаб саёҳат қилиб, бир олам таассуротлар олишди.
Фестивалнинг якуний қисмида концерт дастури намойиш этилди. Байрамона хуш кайфиятда ўтган тадбир аввалида Ёшлар ишлари агентлиги директори ўринбосари Дилноза Каттахонова сўзга чиқиб, Иккинчи жаҳон урушида ўзбек халқининг ғалабага қўшган ҳиссаси, жасорати, матонати ҳақида сўзлади. Ёшларни тинчликнинг қадрига етишга, мана шундай доруломон кунларга етиб келишимизга сабабчи бўлган қаҳрамон ота-боболаримизга муносиб авлод бўлишга чорлади. Концерт дастури давомида Миллий гвардия Республика ихтисослаштирилган мусиқа академик лицейи ўқувчилари ижросидаги мусиқали чиқишлар ёшларда катта таассурот қолдирди.
Шунингдек, ҳарбий санъаткорлар ва таниқли эстрада хонандалари ижросида шўх куй-қўшиқлар ёшлар учун ҳавола этилди.