MINGLAB YoSHLARNI BIRLASHTIRGAN “SHON-SHARAF” RESPUBLIKA HARBIY FESTIVALI
Toshkent shahridagi “G‘alaba bog‘i” yodgorlik majmuasida Ikkinchi jahon urushi qatnashchilari va front ortida xizmat qilgan yurtdoshlarimiz xotirasiga bag‘ishlab ilk bor “Shon-sharaf” respublika harbiy festivali bo‘lib o‘tdi. Mingdan ortiq yoshlar ishtirok etgan mazkur festival O‘zbekiston Respublikasi yoshlar ishlari agentligi, Mudofaa, Milliy gvardiya, Ichki ishlar, Favqulodda vaziyatlar, Davlat xavfsizlik xizmati, Davlat bojxona qo‘mitasi hamda Oliy va o‘rta maxsus taʼlim, Xalq taʼlimi vazirliklari bilan hamkorlikda tashkillashtirildi.
Festivalda dastlab yoshlar qahramon o‘zbek ayoli Zulfiya Zokirova va uning sadoqatli kelinlari sharafiga o‘rnatilgan “Matonat madhiyasi” majmuasi poyiga O‘zbekiston Respublikasi Milliy gvardiyasi Faxriy qorovul bo‘linmasi harbiy xizmatchilari hamrohligida gulchambarlar qo‘yib, hurmat bajo keltirishdi.
Tadbir davomida oliy harbiy taʼlim muassasalari kursantlari hamda Toshkent “Temurbeklar maktabi” o‘quvchilarining saf yurishlari namoyish etildi. Festivalning ikkinchi qismi “Shon-sharaf” muzeyida davom ettirildi. Unda faxriylar yoshlarga harbiy xizmatdagi yutuqlari va hayot yo‘llari haqida so‘zlab berishdi. Uchrashuv so‘ngida yoshlar muzey bo‘ylab sayohat qilib, bir olam taassurotlar olishdi.
Festivalning yakuniy qismida konsert dasturi namoyish etildi. Bayramona xush kayfiyatda o‘tgan tadbir avvalida Yoshlar ishlari agentligi direktori o‘rinbosari Dilnoza Kattaxonova so‘zga chiqib, Ikkinchi jahon urushida o‘zbek xalqining g‘alabaga qo‘shgan hissasi, jasorati, matonati haqida so‘zladi. Yoshlarni tinchlikning qadriga yetishga, mana shunday dorulomon kunlarga yetib kelishimizga sababchi bo‘lgan qahramon ota-bobolarimizga munosib avlod bo‘lishga chorladi. Konsert dasturi davomida Milliy gvardiya Respublika ixtisoslashtirilgan musiqa akademik litseyi o‘quvchilari ijrosidagi musiqali chiqishlar yoshlarda katta taassurot qoldirdi.
Shuningdek, harbiy sanʼatkorlar va taniqli estrada xonandalari ijrosida sho‘x kuy-qo‘shiqlar yoshlar uchun havola etildi.
