MUTAXASSISLARNING KASB MAHORATLARI OSHIRILDI
Joriy yilning 25 noyabr kuni O‘zbekiston Respublikasi Milliy gvardiyasi Ixtisoslashtirgan o‘quv markazi “Mutaxassislarni tayyorlash kursi”larida tahsil olgan Milliy gvardiya hamda Ichki Ishlar Vazirligi Qorovul qo‘shinlari bo‘linmalari mutaxassislarining bitiruv tadbirlari bo‘lib o‘tdi.
Kurs davomida tinglovchilarga Markaz o‘qituvchilari tomonidan harbiy xizmatchilarning mutaxassisliklari bo‘yicha o‘q otish, balandlik ishg‘ol, ruhiy-jismoniy, aloqa, razvedka, maxsus taktik hamda harbiy muhandislik tayyorgarligi fanlaridan nazariy va amaliy mashg‘ulotlar o‘tildi.
Mazkur o‘quv kurslari davomida “Moddiy-texnik taʼminot” siklida zirhli texnika haydovchilarini tayyorlash kurslari tashkil etilib, unda tinglovchilar bilan kunduzgi va tungi amaliy haydash mashg‘ulotlari bilan birga texnikalarga xizmat ko‘rsatish usullari bo‘yicha mashg‘ulotlar olib borildi.
Shu bilan bir qatorda, zirhli texnikalarga xizmat ko‘rsatish va ularni taʼmirlashni o‘rganish jarayoni Chirchiq shahrida joylashgan “Zirhli texnikalarni taʼmirlash” zavodida amalga oshirildi.
O‘quv kurslari yakunida Markaz o‘qituvchilari tomonidan nazariy va amaliy tayyorgarlik natijalari bo‘yicha yakuniy sinovlar qabul qilindi.
Shundan so‘ng Markaz “Mutaxassislarni tayyorlash kursi”da tahsil olgan harbiy xizmatchilarga sertifikatlar topshirish marosimi bo‘lib o‘tdi.
