Mamlakatimizda nogironligi bo‘lgan, ota-ona qaramog‘idan mahrum va yetim bolalarni davlat tomonidan qo‘llab-quvvatlashni kuchaytirish borasida joriy qilingan yangi tizim va unda belgilab berilgan aniq va maqsadli vazifalar mehridaryo xalqimiz qalbidan joy olib ulgurdi.

Bugungi kunga kelib respublikamiz bo‘ylab Mehribonlik uylari tarbiyalanuvchilarini o‘z qaramog‘iga olayotgan oilalar soni ko‘payib borayotgani natijasida Navoiy hamda Namangan viloyatlaridagi mehribonlik uylarida bironta qalbi o‘ksik bolajon qolmasdan ushbu muassasalar eshiklari butkul yopilganligi fikrimiz dalilidir.

Oilaviy bolalar uylari faoliyatini yo‘lga qo‘yishdek ezgu ishga qo‘l urayotgan zamonamiz qahramonlari bilan suhbatlashganda “Mehribonlik uylarida hech kim qolmasligi kerak, shundagina ulug‘ ajdodlarimiz, ota-bobolarimiz ruhlari shod bo‘lib, bizdan rozi bo‘ladilar” deya bildirgan fikrlarini eshitib, oliyjanob xalqimiz borligidan va shu yurtda tug‘ilib o‘sayotganimizdan beixtiyor qalbimizda faxr-iftixor tuyg‘usi jo‘sh uradi.

Xususan, Namangan viloyat hokimligi, Xalq taʼlimi va Milliy gvardiya ko‘magida 26-sonli Mehribonlik uyida yashab kelgan 41 nafar murg‘ak qalb egalari bo‘lmish tarbiyalanuvchilardan 26 nafari o‘z oilasiga va yaqin qarindoshlariga 15 nafari esa oila sharoitidagi muhitda yashashdek baxtga va ota-ona mehriga ega bo‘ldilar.

Kuni kecha ushbu Mehribonlik uyidan 5 nafar so‘ngi tarbiyalanuvchilarni o‘z bag‘riga olgan Ismonboyevlar oilasi Namangan viloyatida Mehribonlik uyi eshiklari yopilib faoliyati butkul tugallanishiga hamda “Mehribonlik uyi” degan qalblarni og‘rituvchi yozuvlarning olib tashlanishiga munosib hissa qo‘shgan holda zamonamiz qahramonlariga aylanishdi.

Eslatib o‘tamiz ilk bor respublikamiz bo‘ylab Navoiy viloyatida Mehribonlik uylari eshiklari yopilib, viloyatda mavjud Mehribonlik uylari va Bolalar shaharchalarida yashab kelgan 96 nafar qalbi o‘ksik, tarbiyalanuvchilardan 53 nafari oilaviy bolalar uylariga, 11 nafar o‘g‘il-qizlar o‘z oilasiga va yaqin qarindoshlari bag‘riga, shuningdek 32 nafari taʼlim muassasalariga o‘qishga kirib mustaqil hayotni boshlaganliklari munosabati bilan ushbu muassasa o‘z faoliyatini tugallagan edi.