SPORTCHILARIMIZNING NAVBATDAGI G‘ALABASI
Aralash jang sanʼatlari assotsiatsiyasi tomonidan joriy yilning 7-10 sentyabr kunlari Toshkent shahrida yoshlar va kattalar o‘rtasida aralash jang sanʼati bo‘yicha “O‘zbekiston kubogi” musobaqasi o‘tkazildi. Mazkur musobaqada Milliy gvardiya terma jamoasi tarkibida 11 nafar harbiy xizmatchi va xodimlar ishtirok etdi.
Murosasiz kechgan bahslarda qo‘riqlash xizmatining Toshkent shahar, Qashqadaryo, Surxondaryo viloyatlari boshqarmalarining safdor xodimlari Ataxodjayev Zafar, Eshnazarov Meliqul, Ibrohimov Abdumannonlar 3-o‘rinni qo‘lga kiritishgan bo‘lsa, Milliy gvardiya Toshkent shahar bo‘yicha boshqarmasi harbiy xizmatchisi katta leytenant Abdullayeva Umida va Buxoro viloyati bo‘yicha boshqarmasi harbiy xizmatchisi oddiy askar Abdurahmonov Hushnud faxrli 1-o‘ringa sazovor bo‘lishdi.
G‘olib bo‘lgan sportchilarimiz 2023 yilning noyabr oyida Albaniya davlatida bo‘lib o‘tadigan jahon chempionatiga yo‘llanma olishdi.
Harbiy xizmatchilarimizni erishgan zafarlari bilan muborakbod etib, kelgusi musobaqalarda ham g‘alaba va muvaffaqiyatni qo‘ldan bermasdan, faqat ulkan yutuq sohiblari bo‘lishlarini tilab qolamiz!
