O‘zbekiston huquqni muhofaza qiluvchi organlar qo‘l jangi federatsiyasi sportchilari va murabbiylari Jahon chempionatida muvaffaqiyatli ishtirok etganligi uchun munosib taqdirlandi.
Joriy yilning 16-18 iyun kunlari Qozog‘iston Respublikasi poytaxti Ostona shahrida bo‘lib o‘tgan qo‘l jangi sporti bo‘yicha Jahon chempionatida umumjamoa hisobida O‘zbekiston terma jamoasi faxrli 3-o‘rinni egalladi. Shu munosabat bilan Milliy gvardiya Maʼnaviyat va maʼrifat markazida qo‘l jangi bo‘yicha jahon chempionatida 7 ta oltin, 6 ta kumush va 12 ta bronza medalini qo‘lga kiritgan terma jamoamiz murabbiylari va aʼzolarini taqdirlash marosimi bo‘lib o‘tdi.
O‘zbekiston huquqni muhofaza qiluvchi organlar qo‘l jangi federatsiyasi raisi, Milliy gvardiya qo‘mondoni general-mayor R.Jo‘rayev sportchilarni nufuzli xalqaro musobaqalarda muvaffaqiyatli ishtirok etib, faxrli uchinchi o‘rinni egallagani bilan tabrikladi. Shuningdek, mazkur musobaqagacha qo‘l jangi ustalari bo‘lgan sportchilarimiz xalqaro musobaqalarda uch marta g‘oliblikni qo‘lga kiritib, shohsupaning eng yuqori pog‘onasiga ko‘tarilganligini taʼkidladi. Jumladan, 2021-yilda Toshkent shahrida o‘tkazilgan jahon chempionatida O‘zbekiston terma jamoasi 8 ta oltin, 11 ta kumush va 8 ta bronza medalini qo‘lga kiritgan; 2022-yilda Buxoro shahrida bo‘lib o‘tgan yoshlar va o‘smirlar o‘rtasidagi jahon chempionatida; yakunda Qozon shahrida tashkil etilgan kattalar o‘rtasidagi Osiyo chempionatida qo‘l jangchilarimiz 8 ta oltin, 7 ta kumush, 9 ta bronza medallarini qo‘lga kiritishdi.
Bugungi kunda respublikamizda 781 ta seksiyada 30 mingdan ortiq yoshlar muntazam qo‘l jangi sporti bo‘yicha mashg‘ulotlarda ishtirok etib kelishmoqda.
Federatsiya raisi murabbiylarga professional sportchilarni tarbiyalayotgani uchun minnatdorlik bildirib, sportchilarning o‘zlariga esa – mashaqqatli mehnati va g‘alabaga bo‘lgan irodasi uchun, shuningdek ularga bundan buyon ham xizmat va sportda hamda kuzda Belarus Respublikasida bo‘lib o‘tadigan qo‘l jangi sporti bo‘yicha Jahon kubogi musobaqasida g‘alaba qozonishini tiladi. Shu bilan birga navbatdagi jahon chempionatida turli namunadagi medallarni qo‘lga kiritgan o‘n ikki nafar qo‘l jangi sportchilariga, “Xalqaro toifadagi sport hakami” malaka toifasi bilan taqdirlangan ikki nafar hakamga “Fidoyi xodimi”, “Aʼlo xizmatlari uchun”, “Namunali xizmatlari uchun” ko‘krak nishonlarini hamda qo‘l soatlari va faxriy yorliqlarni topshirdi.
